Olís-spá karla 2022-23: Hefðu þurft að nýta blikið betur

Íþróttadeild Vísis og Stöðvar 2 Sports spáir fyrir um gengi liðanna í Olís-deild karla en keppni í deildinni hefst með fjórum leikjum fimmtudaginn 8. september.

Íþróttadeild spáir KA 8. sæti Olís-deildar karla í vetur og að Akureyringar fari niður um eitt sæti frá síðasta tímabili en komist í úrslitakeppnina þriðja árið í röð.

Blik sást í augum KA-manna í fyrra enda vantaði ekki hápunktana hjá þeim gulu og bláu. Leiddir áfram af Óðni Þór Ríkharðssyni komst KA í bikarúrslit í fyrsta sinn í átján ár en tapaði fyrir Val í frábærum úrslitaleik. KA-menn enduðu í 7. sæti Olís-deildarinnar og féllu út í átta liða úrslitum eftir magnað einvígi gegn Haukum þar sem allir leikirnir unnust með einu marki.

Annað árið í röð missti KA markakóng og besta leikmann Olís-deildarinnar. Eftir tímabilið 2020-21 kvaddi Árni Bragi Eyjólfsson en Óðinn Þór fyllti skarð hans með glæsibrag. KA hefur ekki fengið viðlíka liðsstyrk fyrir þetta tímabil. Liðið skipti við Stjörnuna á vinstri hornamönnum, missti Arnar Frey Ársælsson en fékk Dag Gautason aftur, og fékk unglingalandsliðsmanninn Gauta Gunnarsson frá ÍBV.

Ólafur Gústafsson missir af fyrstu mánuðum tímabilsins og þá er hinn mjög svo áreiðanlegi Jón Heiðar Sigurðsson hættur. Það er því ekkert offramboð af rétthentum útispilurum hjá KA og línumannsstaðan er enn frekar veik.

KA virðist vera með veikara lið en á síðasta tímabili og það hefði verið gaman að sjá Akureyringa nýta meðbyrinn, nýta blikið og minnka bilið milli þeirra og sterkustu liða Olís-deildarinnar.

Gengi KA undarinn áratug

Lykilmaðurinn

Einar Rafn kom til KA fyrir síðasta tímabil eftir mörg góð ár hjá FH. Hann stóð fyrir sínu með 3,9 mörk og 3,5 stoðsendingar að meðaltali í leik en það leiðinlega fyrir Einar Rafn var að KA hrökk ekki almennilega í gang fyrr en eftir að hann meiddist. Allan Norðberg fór þá í stöðu hægri skyttu og leysti hana prýðilega og Óðinn Þór raðaði inn mörkum. Örvhentir leikmenn hafa verið stjörnur KA undanfarin tvö tímabil og spurningin er hvort röðin sé komin að Einari Rafni í vetur. Hann er vissulega allt öðruvísi leikmaður en Árni Bragi og Óðinn Þór en ekki vantar hæfileikana eða reynsluna hjá honum.

Félagaskiptamarkaðurinn

Fortíðarhetja sem gæti nýst í vetur

Sem fyrr sagði vantar talsvert upp á breiddina vinstra megin fyrir utan hjá KA. Það væri því ekki ónýtt fyrir liðið að geta notað sjálfan Róbert Julian Duranona sem hreif stuðningsmenn KA með sínum þrumuskotum og leikgleði undir lok síðustu aldar og átti stóran þátt í því að Akureyringar yrðu Íslandsmeistarar í fyrsta sinn 1997. Duranona er einn allra besti, ef ekki besti, erlendi leikmaður sem hefur spilað hér á landi og lék síðan með íslenska landsliðinu eftir að hafa fengið ríkisborgararétt.