Heilu hraukarnir af ólesnum dagblöðum fara beint í ruslið

Fyrir skömmu birti íbúi nokkur á höfuðborgarsvæðinu myndskeið af tveimur blaðberum sem voru árla dags á rafskútum sínum í óða önn við að troða útburði dagsins í ruslastamp sem stendur við Sogaveg. 

Þeir voru fljótir að koma blaðinu frá sér en fólk í því hverfinu fékk ekki dagblöðin sín þann daginn frekar en svo oft.

Í öðrum hverfahópi, Langholtshverfi – 104, er einnig að finna kunnulega umræðu; þar kannast ýmsir íbúar ekki við að hafa séð dagblöð lengi. Og einn í hópnum birti mynd af vænum stafla af Fréttablaðinu sem lá á endurvinnslugámi. Karl Ágúst Úlfsson leikari á forsíðu blaðs sem fór ólesið í ruslið. Myndaeigandinn spyr hvort það kunni að vera ástæðan?

Vert er að geta þess að vitaskuld er víða að finna samviskusama blaðbera en þeir sem afgreiða blaðburðinn með þessum hraðvirka hætti koma sannarlega óorði á þá annars gagnmerku stétt sem eru blaðberar.

Viðvarandi vandi að blaðabunkar fari beint í ruslið

Vísir beindi fyrirspurn til Sorphirðu Reykjavíkur og fyrir svörum varð Inga Rún Sigurðardóttir, sérfræðingur í upplýsingamálum og miðlun. Hún sagði að þetta hafi verið viðvarandi vandamál og lengi.

„Já, ég get staðfest það að við könnumst vel við það að „heilu hraukarnir“ eins og þú segir fari í ruslið,“ segir Inga Rún eftir að hafa séð skjáskot af hinum bíræfnu blaðberum.

Inga Rún sagði það jafnframt vera svo að við endurvinnslugáma fyrir pappír á grenndarstöðvum sem Reykjavíkurborg rekur megi gjarnan finna heilu dagblaðabunkana.

„Því miður hefur þetta verið með þessum hætti um langa tíð. Við höfum orðið vör við þetta við losun gámanna. Einnig hafa verið settar upp eftirlitsmyndavélar við tvær grenndarstöðvar en blaðburðarfólk hendir ítrekað blaðabunkum í þá. Rætt hefur verið við Póstdreifingu vegna þessa. Við höfum lagt til að Póstdreifing safni saman eða bjóði upp á losunarstað fyrir þessa bunka fyrir blaðburðafólk en án árangurs,“ segir Inga Rún.

Fyrirtækið Póstdreifing, sem Inga Rún vísar til, sérhæfir sig í dreifingu prentefnis hér á landi. Fréttablaðið og Morgunblaðið eru meðal dagblaða og tímarita sem fyrirtækið dreifir. 

Hnignun prentaðra miðla

Ljóst er að mjög hefur fjarað undan dagblaðaútgáfu með netinu, ekki bara á Íslandi heldur um allan hinn vestræna heim. Í nýjustu lestrartölum Gallup mælist lestur Fréttablaðsins 27,7 prósent alls. Þetta er veruleg hnignun frá því sem var árið 2007 þegar rúm 65 prósent lásu blaðið, eins og segir í umfjöllun Kjarnans um dagblaðalestur.

Jón Þórisson, forstjóri Torgs, talar í nýlegri umfjöllun Fréttablaðsins um hnignun á dagblaðamarkaði. Hann segir að Fréttablaðið beri á prenti „ægishjálm yfir aðra miðla á hér á landi hvað varðar útbreiðslu og lestur.“ Þó verði að horfast í augu við það að á einhverjum tímapunkti í framtíðinni muni Fréttablaðið, sem í dag má einnig lesa í rafrænni útgáfu, hætta að koma út á prenti.