Eldur kviknaði í vinnu­vél í ál­verinu í Straums­vík

Allur mannafli slökkviliðsins var sendur á staðinn en það voru fjórir dælubílar, körfubíll og sjúkrabílar. Engan sakaði.

„Þegar okkar menn komu á staðinn þá var töluverður reykur en ekkert mikill eldur í raun og veru,“ segir Rúnar Helgason, varðstjóri hjá slökkviliði höfuðborgarsvæðisins. Hann segir slökkvilið frá tveimur stöðvum hafa mætt á staðinn.

Slökkvilið höfuðborgarsvæðisins aðstoðaði slökkvilið álversins við slökkvistörf. Verið var að klára að slökkva í glæðum um klukkan 19:00 en tilkynningin kom til slökkviliðsins klukkan 18:13.