Ragnar Arnalds fyrrverandi ráðherra er látinn

Frá þessu er sagt í Morgunblaðinu í morgun þar sem fram kemur að Ragnar fæddist í Reykjavík 8. júlí 1938. Foreldrar hans voru Sigurður Arnalds, útgefandi og stórkaupmaður og Guðrún Jónsdóttir Laxdal kaupkona. 

Ragnar lauk stúdentsprófi frá Menntaskólanum í Reykjavík árið 1958 og stundaði nám í bókmenntum og heimspeki við sænska háskóla á árunum 1959 til 1961 áður en hann sneri aftur heim og lauk lögfræðiprófi frá Háskóla Íslands árið 1968. 

Ragnar kenndi við Gagnfræðiskólann í Flensborg í Hafnarfirði árin 1958 til 159, Gagnfræðiskóla Vesturbæjar í Reykjavík árin 1967 til 1969 og við Gagnfræðiskólann við Laugalæk árin 1969 til 1970 en haustið 1970 var hann settur skólastjóri við barna- og unglingskólann í Varmahlíð í Skagafirði þar sem hann starfaði til ársins 1972. 

Ragnar var landskjörinn þingmaður fyrir Alþýðubandalagið á Norðurlandi vestra  frá árinu 1963 til 1967 og sat sem alþingismaður frá 1971 til 1999. Hann var þá menntamála- og samgönguráðherra frá 1978 til 1979 og fjármálaráðherra frá 1980 til 1983. Hann varð þá fyrsti varaforseti Alþingis 1995 til 1999. 

Ragnar var þá virkur í menningarmálum en hann var ritstjóri Frjálsrar þjóðar árið 1960, Dagfara frá 1961 til 1962 og Nýrrar útsýnar árið 1969. Þá samdi Ragnar leikrit, meðal annars Uppreisn á Ísafirði sem Þjóðleikhúsið sýndi árið 1986 og Sveitasinfóníu sem Leikfélag Reykjavíkur setti upp árið 1988. Auk þess skrifaði hann skáldsögurnar Eldhuginn - sagan um Jörund, Drottning rís upp frá dauðum og Keisarakokteilinn, sem komu út á milli 2005 og 2018. 

Auk þess skrifaði Ragnar tvær æviminningabækur, Æskubrek á atómöld og Gandreið á geimöld sem komu út 2017 og 2018. Ragnar lætur eftir sig eiginkonu sína, Hallveigu Thorlacius brúðuleikara, og dæturnar Guðrúnu og Helgu.