Mygla fannst í aðal­byggingu Kárs­nes­skóla við Vallar­gerði

Í samtali við fréttastofu segist Björg Baldursdóttir, skólameistari Kársnesskóla vera þakklát fyrir hversu hratt hefur verið brugðist við niðurstöðunum. Mygla fannst í gömlu byggingu Kársnesskóla við Skólagerði fyrir nokkrum árum síðan og hann rifinn í kjölfarið. Ný bygging Kársnesskóla er í þann mund að rísa við Skólagerði og vonast skólameistari til þess að kennsla geti hafist þar haustið 2023.

Björg segir fjögur eða fimm sýni hafa verið tekin í kennslustofum húsnæðisins við Vallargerði þegar kennarar létu vita af versnandi loftgæðum. Loftgæðin hafi mælst góð á sumum stöðum en verri annars staðar. Ákveðið hafi verið að rýma sex kennslustofur þrátt fyrir að mygla hafi aðeins fundist í einu sýni, það hafi verið gert til þess að ganga úr skugga um að öryggi nemenda og kennara væri gætt. Mygluna segir hún hafa fundist í gluggasyllu við  útvegg.

Hún segir kennara og skólastjórnendur vera nokkuð brennd vegna fyrri reynslu. Viðgerðum verði lokið um áramót og þau vonist til þess að allir verði komnir á sinn stað um miðjan desember.

„Þegar maður er í svona eldra húsnæði þá veit maður að það þarf að halda þessu við og maður veit aldrei. Það er svona finnst mér verið að birgja brunninn og ég er mjög glöð að þetta sé gripið strax,“ segir Björg.

Hún segir niðurstöður sýnatöku komið í þessari viku og búið sé að koma nemendum fyrir á nýjum stöðum á skólasvæðinu þar sem þau geta verið tímabundið. Frístundin sé til dæmis notuð til kennslu ásamt myndmenntarstofu. Ganginum sem þarf að laga hefur verið lokað í heild sinni.

Þetta valdi auðvitað einhverjum óþægindum en kennslan verði ekki fyrir raski og gengið sé úr skugga um að truflunin verði sem allra minnst. Sjötíu til níutíu börn hafi verið færð til innan skólans vegna ástandsins. Kennsla á nýjum stöðum hefst eftir helgi.

Björg segir að auðvitað vilji enginn lenda í þessari stöðu en hún sé þakklát fyrir hversu hratt sé unnið úr málunum.

„Það eru allir sammála um það held ég hérna innanhúss að við erum mjög ánægð með að þetta skuli gerast svona hratt. Við erum ekki látin bíða eða sett aftast í röðina heldur voru menn komir og átti bara að gera þetta einn, tveir og þrír og við erum tilbúin. Það er ljósið finnst mér í annars leiðinlegri stöðu,“ segir Björg.