Kvöldfréttir Stöðvar 2

Ákvörðun heilbrigðisráðherra um að skipa forstjóra Sjúkratrygginga án auglýsingar hefur verið gagnrýnd. Við ræðum við þingmann stjórnarandstöðunnar í beinni útsendingu.

Við heyrum í Guðmundu Tyrfingsdóttur, níræðum bónda á Suðurlandi sem sviptur var vörslu allra gripa sinna. Hún segir það svíða mest að skyldmenni hennar hafi nýtt sér dvöl hennar á sjúkrahúsi til að svipta hana dýrum hennar. Nágrannar bóndans segjast hneykslaðir yfir málinu.

Íslendingur sem búsettur er í Svíþjóð segist finna vel fyrir hækkandi rafmagnsverði. Það knýr áfram verðbólguna þar í landi, sem hefur ekki verið meiri í rúma þrjá áratugi. Fanndís Birna heyrði í manninum sem fékk rafmagnsreikning upp á 180 þúsund krónur um mánaðarmótin.

Þá fjöllum við um 39 tillögur að umbótum í bráðaþjónustu sem viðbragðsteymi á vegum heilbrigðisráðherra hefur lagt fram, verðum í beinni útsendingu frá óhefðbundnu jólahaldi Úkraínumanna á Íslandi og tökum púlsinn á IDOL höllinni nú þegar styttist í fyrstu beinu útsendinguna þar.

Þetta og fleira í kvöldfréttum Stöðvar 2 á slaginu klukkan 18:30.