Fram kemur í nýbirtri tilkynningu á vef samtakanna að eftir afar góða ávöxtun eignasafns lífeyrissjóða undanfarin ár hafi orðið viðsnúningur á síðasta ári. Árið einkenndist af óróleika á alþjóðlegum mörkuðum og aukinni verðbólgu innanlands sem og erlendis.
„Á nýliðnu ári voru miklar sviptingar á eignamörkuðum, meðal annars vegna stríðsástandsins í Úkraínu og orkumála í Evrópu. Innlend verðbólga ársins var 9,6 prósent og gáfu bæði hlutabréfa- og skuldabréfamarkaðir eftir,“ segir í tilkynningunni.
Þrátt fyrir neikvæða ávöxtun ársins 2022 er 10 ára meðalraunávöxtun sjóðanna um 4,6 prósent og 5 ára um 4,0 prósent sem er vel umfram 3,5 prósenta ávöxtunarviðmið skuldbindinga.
Eins og Innherji hefur fjallað um juku lífeyrissjóðirnir verulega við gjaldeyriskaup sín undir árslok 2022 og keyptu að jafnaði erlendan gjaldeyri fyrir um 11,4 milljarða í hverjum mánuði á síðustu fjórum mánuðum ársins.
Samkvæmt nýlegum tölum Seðlabanka Íslands námu gjaldeyriskaup lífeyrissjóðanna samtals 104 milljörðum í fyrra. Á fyrstu ellefu mánuðum ársins höfðu sjóðirnir keypt gjaldeyri fyrir samanlagt um 91,7 milljarð króna og því námu hrein gjaldeyriskaup þeirra rúmlega 12 milljörðum í desembermánuði.
Mikill og vaxandi þungi var í ásókn sjóðanna í eignir í erlendri mynt þegar líða tók á árið 2022 sem endurspeglast í því að lífeyrisjóðirnir keyptu gjaldeyri fyrir nálægt 46 milljarða á tímabilinu frá september til loka desember. Svo umfangsmikil gjaldeyriskaup á jafn skömmum tíma hafa ekki sést frá árinu 2019 en þá – ólíkt stöðunni sem nú er uppi – var mikill afgangur á viðskiptum þjóðarbúsins við útlönd sem gaf sjóðunum færi á að fjárfesta verulega erlendis án þess að hefði teljandi áhrif á gengisstöðugleika.
Á öllu árinu 2021 keyptu sjóðirnir til samanburðar gjaldeyri fyrir um 53 milljarða.
