Fram­vísar launa­­seðlum olíu­bíl­­stjóra: „Við erum ekki há­­launuð“

Halldór Benjamín Þorbergsson, framkvæmdastjóri Samtaka atvinnulífsins, benti á það í viðtali við Stöð 2 á dögunum að olíubílstjórar hafi verið með um níu hundruð þúsund krónur í meðalheildarlaun á mánuði í fyrra. Til samanburðar nefnir hann að 70 prósent fullvinnandi manna á almennum vinnumarkaði árið 2021 hafi verið með lægri mánaðarlaun en 858 þúsund krónur. 

Halldór gagnrýnir jafnframt í viðtalinu að í viðtali við trúnaðarmann olíubílstjóra sem birtist í Morgunblaðinu í vikunni hafi komið fram að olíubílstjórar færu fram á 670 krónu launahækkun á tímann. Það bættist ofan á aðrar launahækkanir sem farið hefur verið fram á. Að sögn Halldórs hefur sú krafa ekki verið kynnt SA. 

„Það jafngildir um 30 prósent hækkun launa til viðbótar við 10 prósent hækkun 2022. Bara dagvinnulaun bílstjóranna eiga að hækka um 120 þúsund krónur á mánuði, sem er nærri tvöfalt meiri hækkun en Efling krefst fyrir þernur á hótelum,“ segir Halldór í viðtali hjá Morgunblaðinu.

Á hádegi í gær hófst atkvæðagreiðsla meðal Eflingarfélaga hjá Olíudreifingu, Skeljungi, Samskipum, Berjaya hótelum og Edition hótelinu um verkfallsboðun. Atkvæðagreiðslunni lýkur klukkan 18 næstkomandi þriðjudag, 7. febrúar, sama dag og verkföll á Íslandshótelum hefjast ef þær áætlanir ganga eftir. 

Samþykki þessir tæplega 600 Eflingarfélagar verkföll hefjast þau á hádegi 15. febrúar næstkomandi. Ráðgert er að verkföllin hafi víðtæk áhrif, ekki síst þegar eldsneyti fer að klárast á bensínstöðvunum. Stærstu flutningsaðilar á höfuðborgarsvæðinu gera ráð fyrir því að geta haldið starfsemi áfram í viku eftir að verkföll hefjast. 

Einstaka bílstjóri með há laun

Örvar Þór Guðmunds­son, olíu­flutn­inga­bíl­stjóri og trúnaðarmaður Efl­ing­ar inn­an Ol­íu­dreif­ing­ar, segir í samtali við Vísi að vel megi vera að einn og einn olíubílstjóri sé með jafnhá laun og Halldór Benjamín segir vera meðallaun þeirra.

„En það eru menn sem eru að vinna hér um bil allan sólarhringinn alla daga vikunnar. Með þvílíkri yfirvinnu að það er eiginlega ekki mennskt,“ segir hann.

Örvar Þór sendi Vísi launaseðla fjögurra bílstjóra sem keyra fyrir Olíudreifingu, Samskip og Skeljung. Á þeim kemur fram að grunnlaun bílstjóranna eru á bilinu 389 þúsund til 449 þúsund krónur á mánuði. Heildarlaun þeirra eru bilinu 628 þúsund og 1.058 þúsund. Sá þeirra sem var með rúma milljón króna á mánuði vann 122 yfirvinnutíma á taxtanum 4.370 krónur á klukkustund.

Meðaltal heildarlauna bílstjóranna er 771.841 króna. Vert er að taka fram að um lítið þýði er að ræða.

Ómálefnalegt að skella skuldinni á Eflingu eina

Örvar Þór gagnrýnir málflutning Halldórs Benjamíns og segir hann reyna að skella skuldinni á Eflingu eina.

„Það verk­fall hef­ur áhrif á dag­legt líf allra í land­inu. Efl­ing ætl­ar sér þannig að valda öllu sam­fé­lag­inu gríðarleg­um skaða til þess að berj­ast fyr­ir kjör­um karla með há laun í ís­lensku sam­hengi,“ er haft eftir Halldóri Benjamín í Morgunblaði gærdagsins.

Örvar Þór bendir á að Efling hafi þrívegis breytt kröfum sínum í yfirstandandi kjaraviðræðum við SA en SA ekki gefið tommu eftir.

Þá bendir hann á að málflutningur Halldórs Benjamíns sé beinlínis rangur enda séu það ekki einungis karlar sem vinna sem olíubílstjórar. Konur sem geri það séu ekki ánægðar með að stéttin sé máluð upp sem eintóm karlastétt.

Krefjast þess að réttindi verði metin til launa

Þá segir Örvar Þór að áðurnefnd krafa um 670 króna hækkun á tímakaupi olíubílstjóra sé krafa um að svokölluð ADR-réttindi verði metin til launa. Slík réttindi þurfi allir þeir sem aka með hættuleg efni að hafa. 

Þá bendir hann á að efnin sem bílstjórarnir aka með séu stórhættuleg. Enginn vafi sé á því að hættulegt sé að aka með fleiri tonn af eldfimu bensíni eða díselolíu til Ísafjarðar í slæmum akstursskilyrðum, til að mynda.

„Í viðbót við það þá er það þannig að það er enginn sem dregur það í efa að bensín- og díselgufur séu heilsuspillandi,“ segir hann og bætir við að eðlilegt væri að bílstjórar færu fram á aukagreiðslur vegna þeirrar hættu, eins og aðrar starfsstéttir í samfélaginu sem fá aukagreiðslur fyrir að vinna hættuleg störf.