Kvennadeild SVFR hittist annað kvöld

Kvennanefnd SVFR stendur fyrir nokkrum viðburðum yfir vetrartímann sem sniðnir eru að þörfum kvenna í veiði í formi fræðslu og kennslu. Allt þetta er gert til þess að gera þær sem eru að byrja í stangveiði að betri veiðikonum, því alltaf er að koma fram eitthvað nýtt og það er um að gera að fylgjast með. Hvernig getum við náð betri árangri í baráttunni við laxinn? Sigþór Steinn og Hrafn H Hauksson tala um laxinn og kynna fyrir þessum öflugu veiðikonum námskeiðið MAX LAX. Í kjölfarið verður svo hægt að skrá sig á námskeiðið en þeir ætla að halda sér námskeið fyrir konurnar í mars. 

Því næst kemur Hilmar Hansson á svið, hann ætlar að kenna viðstöddum handbrögðin við að kippa flugu úr veiðimanni, hann verður svo með verklega kennslu á eftir. Það getur verið óheppilegt ef veiðifélaginn fær fluguna í hausinn og það þarf að kippa henni úr. Þá er nú gott að kunna réttu handtökin. Opið hús hjá kvennanefnd SVFR verður sem sagt fimmtudaginn 16 febrúar á Ölver í Glæsibæ kl 20:00.