Grótta býður Pétur Theodór velkominn aftur á Nesið

Pétur er uppalinn hjá Gróttu og hefur lengst af ferilsins leikið með liðinu. Hann var markahæsti leikmaður Lengjudeildarinnar þegar Seltirningar unnu hana 2019 og lék svo með þeim í efstu deild tímabilið á eftir. 

Sumarið 2021 var Pétur svo aftur markahæsti leikmaður Lengjudeildarinnar og gekk eftir það tímabil til liðs við Breiðablik. Hann spilaði hins vegar ekkert með Blikum í fyrra því hann sleit krossband í hné á síðasta undirbúningstímabili.

Pétur er nú kominn aftur heim í Gróttu sem endaði í 3. sæti Lengjudeildarinnar á síðasta tímabili. Grótta kynnti hann til leiks með skemmtilegu myndbandi sem má sjá hér fyrir neðan.

Pétur, sem er 27 ára, hefur leikið 136 deildarleiki á Íslandi og skorað 61 mark. Auk þess hefur hann spilað nítján bikarleiki og skorað átján mörk.