Marsspá Siggu Kling - Krabbinn

Ekki endurskoða líf þitt eins og „ég hefði nú ekki átt að gera þetta eða hitt,“ því þú ert á hárréttri tíðni við alheimsorkuna. Svo hættu að pikka í þig og brjóta sjálfan þig niður. Þú ættir að hafa tekið eftir því hversu mikið skýrari draumarnir þínir eru orðnir. Þú skalt líka taka eftir því að það eru til vökudraumar en sú tilfinning er eins og þú dettir aðeins út, en þá er verið að senda þér skilaboð. Það er jafnvel hægt að segja að þú verðir annars hugar og ef þú skoðar það orð þá ertu í sambandi við eigin undirvitund sálar þinnar.

Þú ert búinn að vera og ert að fara í svo margt sem tengist andlegri orku þar sem þú lærir hvernig þú hefur margfalt betri tök á lífinu. Og ef þú vilt hundrað prósent kraft til þín, mér finnst reyndar orðið „power“ betra, þá er best að gera hlutina sjálfur, hvort sem þú hefur sterkt bakland eða ekki.

Það eru svo óstjórnlegir og mikilfenglegir tímar sem þér verða færðir og það kemur út frá þeim aukna skilningi sem þú færð á hvað lífið er og hvernig þú stjórnar lífi þínu.

Það er sérstaklega sterkt fulla tunglið þann sjöunda mars. Og þar sem þú ert sjöundi mánuðurinn og tölustafurinn þrír, sem er marsmánuður, kemur við sögu þá gæti þetta verið upphafið að merkilegri sköpun og andlegum þorsta.

Hlutverk þitt í lífinu er að koma miklu til leiðar, bæði fyrir sjálfan þig og aðra. Það er í eðli þínu að hafa áhrif á samfélagið og þegar þú sérð að þessir töfrar eða galdrar eru þér meðfæddir, þarftu bara að opna vitund þína.

Knús og kossar, Sigga Kling