Guardiola: Hann veit að hann fær færið og verður mættur

Manchester City setti pressu á Arsenal þegar liðið lagði Crystal Palace á útivelli í gær. Erling Haaland skoraði eina mark leiksins úr vítaspyrnu á 78. mínútu leiksins en með sigrinum minnkaði City forystu Arsenal á toppnum niður í tvö stig. Arsenal á leik í dag á útivelli gegn Fulham.

Eftir sigurinn í gær hrósaði Pep Guardiola karakter Norðmannsins Haaland sem hefur verið frábær á tímabilinu en hann kom til City í sumar frá Dortmund.

„Eitt af því besta við hann er að vita að ef hann klikkar á einu færi þá verður hann ekki svekktur. Hann er jákvæður - áfram gakk,“ sagði Guardiola í viðtali við Skysports eftir leik í gær.

„Hann veit að hann fær færið og hann verður mættur. Það er frábær eiginleiki hjá knattspyrnumanni og hjá íþróttamanni almennt. Í knattspyrnu, körfubolta eða tennis, ef þú eyðir tíma í að hugsa um það sem er búið að gerast þá getur þú ekki verið góður íþróttamaður.“

Hann segir að Haaland finni auðvitað fyrir pressunni á honum en að það sé nauðsynlegt.

„Þú þarft að ráða við það. Pressan er þannig að ef við töpum þá séum við búnir að tapa deildinni, ef við töpum 2-0 þá töpum við Meistaradeildinni. Ef við töpum gegn Vinny (Vincent Kompany, knattspyrnustjóri Burnley) þá töpum við FA-bikarnum. Þetta er gott hugarfar, keyra sig áfram til að vera bestur.“