Sjáðu stiklu úr þætti Baldurs um Bestu deild karla: „Það má nú al­veg hætta að snjóa núna“

Í þáttunum heimsækir knattspyrnusérfræðingurinn Baldur Sigurðsson sex félög í Bestu deild karla og nú er komið að því að kíkja til nýliða Fylkis í Árbænum.

Baldur mætti á æfingu Fylkis og hafði skiljanlega smá áhyggjur af veðrinu enda íslenskt vetrarveður eins og það gerist best. Það snjóaði nánast stanslaust þetta kvöld þegar Baldur mætti til að sparka bolta í Árbænum.

„Hvernig er veðrið úti? Er það eitthvað vont,“ spyr leikmaður Fylkis.

Baldur spyr meðal annars Rúnar Pál Sigmundsson þjálfara út í það hvort að það sé satt að hann spili leiðinlegan fótbolta, svokallaðan „Kick and run“ fótbolta.

Það má líka sjá Baldur og Fylkisstrákana æfa út í snjókomunni. „Það má nú alveg hætta að snjóa núna,“ segir einhver þeirra.

Hér fyrir neðan má sjá brot úr þættinum sem er sýndur klukkan 22.10 á sunnudagskvöldið.