Met­verð fékkst fyrir skúlptúr Einars Jóns­sonar á upp­boði

Í tilkynningu frá uppboðshúsinu segir að verkið hafi verið slegið á 11.250.000 krónur en með uppboðs- og höfundaréttargjöldum geri það ríflega 14 milljónir króna í lokaverð.

„Þetta er hæsta verð sem fengist hefur fyrir verk á uppboði á Íslandi en nokkur íslensk verk hafa þó selst á hærra verði á uppboðum erlendis.

Þetta er í fyrsta sinn sem verk af þessu tagi er boðið upp hjá Fold uppboðshúsi og ekki var vitað til þess að til væru fleiri bronsafsteypur af þessu verki eftir Einar en þá sem finna má á safni hans á Skólavörðuholtinu.

Skúlptúrinn er til í tveimur eintökum á safninu, annar úr gifsi og svo bronsafsteypa úti í garðinum, en skúlptúrinn á uppboðinu er í sömu stærð og sá í garðinum í safni Einars. Gifsafsteypan var gerð 1913-14 en ekki er vitað nákvæmlega hvenær bronsafsteypan var gerð, þó er vitað að hún var ekki til þegar safnið var opnað 1923 en að hún sést á ljósmynd sem tekin var 1940.

Aðrir skúlptúrar seldust líka á góðu verði, meðal annars afsteypur eftir Ásmund Sveinsson en einnig verk naívistanna Stórvals og Ísleifs Konráðssonar en verk eftir þann síðast nefnda seldist á tæplega 1,8 milljónir með öllum gjöldum,“ segir í tilkynningunni.