Ásta Dóra er undrabarn í píanóleik

Ásta Dóra er nemandi í tíunda bekk, nýorðin sextán ára. Hún byrjaði í Suzuki píanónámi fjögurra ára og hefur ekki stoppað síðan. Hún er í píanónámi hjá Menntaskólanum í tónlist þar sem Peter Máté, kennir henni og svo sækir hún tíma reglulega til rússnesks kennara í Osló.

En hvað finnst Ástu Dóru um það hvað hún er góð á píanó, nýorðin sextán ára?

„Þetta er allt æfing, þetta er níutíu prósent æfing og tíu prósent heppni. Maður þarf að æfa á hverjum degi, það er mjög mikið að gera ef þú vilt vera flink á píanói. Ég er með marga vini, sem eru að æfa fimm til sex klukkutíma meira en ég og ég er að æfa að minnsta kosti þrjá eða fjóra klukkutíma,“ segir Ásta Dóra.

Foreldrar Ástu, Finnur Þorgeirsson og mamma hennar, Fey eins og hún er alltaf kölluð og er frá Malasíu hafa aldrei verið í tónlist en þau styðja sína dóttur af heilum hug og miklum dugnaði.

„Við höfum farið einar 36 ferðir til Osló og það fer að koma að því að hún fari að ferðast sjálf, þannig að það verður nýr kafli í þessum ferðalögum. Hún fær yfirleitt svona sex til tíu klukkustundir af kennslu hjá kennaranum sjálfum fyrir utan Masterclassa og sögukennsluna. Þannig að það er mikið álag þessa daga. Við förum yfirleitt á föstudegi og komum heim á sunnudegi, tíminn er vel nýttur,“ segir Finnur, stoltur af dóttir sinni eins og Fey mamma hennar og aðrir úr fjölskyldunni og vinir.

Ásta Dóra og hennar fólk var í þættinum „Mig langar að vita“ á Stöð 2 í kvöld. Þátturinn er aðgengilegur á Stöð 2 plús eins og aðrir þættir Magnúsar Hlyns, „Mig langar að vita“.