Páskaspá Siggu Kling - Nautið

Sigga Kling skrifar 7. apríl 2023 06:02

Elsku Nautið mitt, þú vilt svo mikið innst í hjarta þínu gefa eftir og að leyfa öðrum að skína. Þú ert núna búin að lenda í því að hafa þrjóskuna of sterkt í hjartanu. En um leið og þú hugsar að þú ætlir að slaka, þá byrjar allt að rúlla til þín sem þú vilt svo hjartanlega. Þú gefur og gefur og vilt skilja alla, en af því að þú ert svo mikill engill og réttlætisgyðjan í sál þinni svo sterk, þá byrjarðu of oft að skipta þér af einhverju sem þú sérð eftir.

Nautið er frá 20. apríl til 20. maí.

Þú verður að vita það að það sem er búið er ekki til og öllum er í raun og veru sama þó að þú hafir gert mistök varðandi tilfinningar. Þú, eða Nautið og Hrúturinn eru öflin sem stjórna höfðinu. Mikið var ég montin af þessu að vera svona hátt uppi, sem sagt á toppnum. Öll stjörnumerkin hafa tengingu við sérstakan hluta af mannslíkamanum.

Það er fullt tungl í Vogarmerkinu þann sjötta apríl sem er kallað bleika tunglið og í kringum þann tíma er mikið að gerast og þú verður að taka margar ákvarðanir og að standa við þær. Það verður auðvelt fyrir þig að nota þína fallegu þrjósku í þeim efnum. Ef þú ert ekki með ástina þér við hlið en langar að fá bita af henni, þá skaltu senda gyðjunni eða goðinu skýr skilaboð. Þú hefur engu að tapa, en ef það gengur ekki upp þá geturðu strokað þá persónu út úr heimi þínum því að hún á alls ekki heima í útibúi heilans með sinn legubekk, sjónvarp og síma.

Ekki vera hræddur eða hrædd því að hinum megin á vegasaltinu er hugrekki og þú skalt skrifa orðið hugrekki á spegilinn eða þar sem þú sérð þetta orð sem er með þér úti í veröldinni. Það verður svo margt að gerast í kringum fjölskyldu og vináttu en fókusinn þinn þarf að beinast að þínu hjarta. Þín skynjun er ótrúlega há, þig dreymir fyrir hlutum, þú hugsar um eitthvað sérkennilegt sem þú sérð eftir augnablik. Taktu betur eftir lífinu, þá mun allt leika í lyndi.

Knús og kossar, Sigga Kling