Páskaspá Siggu Kling - Tvíburi

Það er svo mikil gló í kringum þig og eina myrkrið sem nær þér er í sálinni. Það tekur enginn eftir þessu vegna þess að þú ert svo góður leikari, orðheppinn og fær, en þú átt það til að gefa fólki í kringum þig svipinn og skilur ekkert í því að sumir haldi þú sért snobbari. Það er svo fjarri lagi, guð minn góður.

Þú ert svo blessaður með það að hin yndislega pláneta Merkúr leiðir veginn, svo þú þarft ekki að hafa áhyggjur. Það eina sem ég les úr kortinu þínu er að það er oftast ekki best að segja öllum hvað er að frétta í kringum þig. Þú skalt vaða áfram, ekki stoppa við neinar hindranir heldur hræra samt svolítilli þolinmæði við þó að þú arkir áfram. Það er einhverskonar sorg í kringum þig, hvort sem það tengist mannfólkinu eða að þér hafi fundist að þú hafir stigið skref sem ekki var þér til lukku.

En útkoman er samt sú úr þessu að þú fórst réttan veg að þessu sem þú vilt. Það er ástarorka hjá þér, það er eins og það rigni ástardropum allt í kringum þig og freistingarnar verða fleiri en færri. Þú ert á leiðinni í betra veðurfar því að eðli þitt er að elta sólina. Þú hefur þá hæfileika að geta unnið alls staðar, horfðu bara í spegil og segðu „allt er fullkomið eins og það er.“

Knús og kossar, Sigga Kling