Páskaspá Siggu Kling - Krabbinn

Þú skalt vera ákveðinn ef þú ert að vinna hjá einhverjum að það er meiri réttur sem þú hefur. Eitthvað í sambandi við peninga er ekki að lenda inni á bankareikning þínum sem stendur. Þú skalt skoða vandlega hvaða möguleika þú hefur til þess að auka peningaorkuna þína. Þann 20. apríl elsku Krabbinn minn er bæði nýtt tungl og sólmyrkvi og plánetan þín er sjálft tunglið. Þú ert beintengdur því svo að tilfinningalíf þitt verður með betra móti.

Þú þarft að læra einhverskonar hugleiðslu, helst bara eitthvað auðvelt sem þú getur gert hvar sem er og hvenær sem er. Og að finna í þessu að þú verður sterkari og sterkari og þá geturðu útilokað þær tilfinningar sem bæði særa þig og halda þér föstum.

Þú skalt bæði vera vakandi og á verði gagnvart því að það gæti verið einhver að spila með þig. Það er til fólk sem að öfundar þig og gæti langað til þess að þér gangi ekki jafnvel og þú átt skilið. Vertu harður í viðskiptum eða í sambandi við launamál í apríl, því ef þú gerir það ekki þá gerir það enginn fyrir þig.

Vorið gefur þér spennandi tíma og reyndar mikið hrós líka. Það er manneskja sem er mjög náin þér sem þú hefur miklar áhyggjur af. Í þessu tilfelli geturðu ekkert gert nema að vera til staðar. Ég vil líka segja þér að þessi tími mun gefa þér óvænta innkomu og þú átt eftir að passa upp á það að hafa einhverja peninga í sjóð eða í einhverskonar geymslu eða bara í umslagi. Í ástarmálum skaltu halda í þá persónu sem er í kringum þig, en ef þú ert á lausu skaltu vanda það meira en vel hver fær bita af þínu fagra hjarta.

Knús og kossar, Sigga Kling