Páskaspá Siggu Kling - Sporðdrekinn

Þú færð svo oft einhverskonar þráhyggju fyrir því að finnast ekkert nógu gott sem þú gerir, en það er tóm vitleysa. Það getur vel verið sð þú sért tengdur því sem er að gerast á Jörðinni, en stoppaðu þá hugsun, því að þú ert Alheimur og guðleg orka býr í hjartastöðinni þinni. Þú þarft ekkert að gera nema að setja kraft í verkið eða í verkin og hver dagur sem kemur til þín núna fram að sumri eflir þig og gerir þig að þeirri manneskju sem þú vilt búa í.

Þú hefur svo töfrandi augnaráð og svo mystíska orku og þar af leiðandi hafa flestir skoðun á þér og þú skalt vera ánægður með það vegna þess að þú ert einstakur karakter. Þegar þú lendir í þeim aðstæðum sem einkennast af streitu og ósamræmi geturðu orðið leiður og niðurdreginn og dregið þig inn í skel. En það er ekki þér að kenna þó að einhverjir hafi ekki unnið vinnuna sína og leggja á þig sitt eigið stjórnleysi.

Hafðu ekki ótta um það að þú eyðir um efni fram, því þú hefur heppnina með þér og hefur alltaf lent á fótunum alveg sama hvernig aðstæðurnar hafa verið. Þú hefur oft hugsað að þú kæmist ekki út úr þeim kringumstæðum því að útlitið væri of svart. Og núna er akkúrat tíminn til að sigra þær hindranir sem þér finnst að hafi verið lagðar fyrir þig, segðu bara hvað þér býr í brjósti og hvað þér finnst, settu fallegan tón í röddina og treystu því, því það verður allt fullkomið.

Knús og kossar, Sigga Kling