Sviptingar á toppnum: Dort­mund nýtti sér tap Bayern

Fyrir leiki dagsins sat Bayern Munchen á toppi þýsku úr­vals­deildarinnar. Eftir að hafa dottið út úr Meistara­deild Evrópu í miðri viku vonaðist Thomas Tuchel, svo til ný­ráðinn knatt­spyrnu­stjóri Bæjara, vafa­laust eftir því að lið sitt myndi rétta úr kútnum í dag en svo varð ekki raunin.

Bayern Munchen komst yfir í leik dagsins með marki frá Sadio Mané á 29.mínútu eftir stoð­sendingu frá Joao Cancelo og reyndist það eina mark fyrri hálf­leiksins en í þeim seinni hrundi leikur læri­sveina Tuchel.

Á níu mínútna kafla náðu leik­menn Mainz að skora þrjú mörk og snúa töpuðum leik yfir í sigur, hreint út sagt ó­trú­legar vendingar en svo fór að leikar enduðu með 3-1 sigri Mainz.

Fagmannleg frammistaða Dortmund

Leikur Mainz og Bayern fór fram í há­deginu í dag og lauk nokkrum klukku­stundum áður en leikur Dort­mund og Frankfurt hófst. Með sigri myndi Dort­mund hrifsa topp­sætið af Bayern og sú varð raunin.

Dort­mund vann afar þægi­legan 4-0 sigur á Frankfurt. Það var Jude Belling­ham sem skoraði fyrsta mark leiksins á 19. mínútu og mörk frá Donyell Malen og Mats Hum­mels í kjöl­farið sáu til þess að Dort­mund fór með þriggja marka for­skot inn til búnings­her­bergja í hálf­leik.

Donyell Malen bætti síðan við öðru marki sínu og inn­siglaði 4-0 sigur heima­manna á 66.mínútu.

Sigur Dort­mund sér til þess að liðið situr með eins stigs for­ystu (60 stig) á Bayern Munchen (59 stig) á toppi þýsku úr­vals­deildarinnar þegar að bæði lið hafa leikið 29 leiki.

Í öðrum leikjum dagsins í þýsku úr­vals­deildinni ber þar helst að nefna að Wer­der Bremen bar sigur­orðið af Herthu Berlin á úti­velli 4-2, Köln hafði betur gegn Hof­fen­heim 3-1 og Wolfs­burg skoraði fimm mörk í 5-1 sigri á Bochum