Ágæt veiði við Hraun í Ölfusi

Þrátt fyrir kulda eru alltaf einhver svæði sem geta gefið sama hvað og eitt af þeim er Hraun í Ölfusi en það er svæðið ofan við Ölfusárbrú að vestanverðu. Þarna er yfirleitt hægt að gera fína veiði þegar það er fiskur á svæðinu enda er sjóbirtingurinn sem þvælist þarna inn og út um ósinn í ætisleit og oft tökuglaður eftir því.

Það veiðist á allt leyfilegt agn en sífellt fleiri fluguveiðimenn eru farnir að kasta flugu og veiða oft bara ágætlega. Það hefur verið að gefa best að veiða á bjartar straumflugur og með sökktaum. Mikilvægt er að leyfa flugunni að koma svo til alveg upp í land því sjóbirtingurinn getur tekið hana á mjög grunni vatni. 

Þarna gætir flóðs og fjöru svo besti tíminn er í aðfallinu og að liggjandanum. Þetta er þess vegna frábært svæði fyrir 4-5 tíma stopp enda stutt frá höfuðborgarsvæðinu, veiðileyfin ekki dýr og veiðivon góð. Það þarf samt að minna veiðimenn á að keyra ekki niður á sandinn því það er mjög auðvelt að festa sig.