Maíspá Siggu Kling: Sporðdrekinn eins og leiftrandi og fegursta eldgos

Sigga Kling skrifar 5. maí 2023 06:00

Elsku Sporðdrekinn minn, þú verður að sjá og athuga að þú ert eldgos og það vilja allir fara og sjá eldgos ef þeir mögulega geta. Annaðhvort bíðum við í langan tíma eftir eldgosi eða þau koma aftur og aftur með stuttu millibili. Núna er fulla fallega Sporðdrekatunglið 5. maí og skapar það mikið sjáanlegt fallegt eldgos hjá þér.

Sporðdrekinn er frá 24. október til 21. nóvember.

Ef þú hefur verið í erfiðum kringumstæðum, þá rístu bara upp eins og Fönixinn úr öskunni. Það er eins og aflið sé með þér í öllum gírum sem þú vilt vera í og þá líka til að hreinsa út veikindi, andleg eða líkamleg, þú hefur kraftinn, aflið, powerið, þú hefur allt.

Það verða sterkir möguleikar á því að þú flytjir þig til, með heimili, vinnu eða hvað sem er, því þú finnur að þú færð betri möguleika, eða þú varst fastur og sást ekki möguleikana. Maí verður þar af leiðandi eins og hjartalínurit, ekkert stopp á neinu og sérstaklega verður áþreifanlegt að veraldleg gæði eins og peningar og svo framvegis koma til þín, þó að þér finnist að það sé alveg á síðustu stundu.

Þegar þér finnst þú sért að missa af einhverju, þá er það bara til þess að nýtt geti tekið meira pláss í þessu rauðglóandi lífi þínu. Ástin og ástríðan eru náttúrulega tengd plánetunni Venus sem er ríkjandi yfir þínu stjörnumerki og líka Nautsmerkinu. Þess vegna eru oft svo góð eða mögnuð samskipti á milli þessara merkja. Það er hægt að segja núna við þig að þú sért eins leiftrandi og fegursta eldgos.

Gerðu litlar eða miklar breytingar á heimili þínu, fötum og útliti, eitt skref i einu, því þá ertu líka að hlúa að þér og þínu rými og með því nærðu betur í hringiðu Alheimsorkunnar til að sveifla þér á fulla ferð áfram.

Knús og kossar, Sigga Kling