Krakkarnir eru mættir á bryggjurnar

Það er eitthvað svo algjörlega Íslenskt að sjá krakka við bryggjurnar að dorga og núna þegar það hlýnar í veðri sjást sífellt fleiri ungir veiðimenn og veiðikonur, sum hver að taka sín fyrstu skref, við bryggjur landsins. Kosturinn við bryggjudorgið er að það fá allir eitthvað í langflestum tilfellum og það er einmitt það sem gerir þetta skemmtilegt. Ekki nóg með það að veiðin geti verið góð heldur er tegundafjöldinn oft ansi mikill. 

Meðal tegunda sem krakkarnir eru að veiða er auðvitað Þorskur og Ufsi líklega algengast en Lýsa, Koli, Rauðspretta, Steinbítur, Makríll og auðvitað Marhnútur meðal þess sem kemur á færið. Búnaðurinn er einfaldur en eitt af því sem er orðið mjög algengt og ætti eiginlega að vera skylda er að sjá krakkana í björgunarvestum. Ekki eru allar bryggjur opnar fyrir dorgi en víðast hvar við hafnarsvæðin eru staðir þar sem dorg er leyfilegt.