Það eru fáir ef nokkur fiskur sem smakkast jafnvel og sjóbleikja, ég held að veiðimenn og veiðikonur sem og lista matreiðslumenn landsins séu sammála því. Að standa við þetta magnaða vatn og veiða sjóbleikju sem endar á pönnu, grilli eða í reyk er hápunktur veiðisumarsins hjá þeim sem stunda þetta vatn. Það er gaman að heyra frá jafn mörgum sem hafa verið að kíkja í Hraunsfjörð síðustu daga og flestir eru að gera ágætis veiði. Bleikjan er feit og vel haldin, yfirleitt um 2-3 pund en það er frábær stærð í matinn.
Allra vönustu veiðimennirnir eru að ná 5-10 fiskum á dag og nokkrir sem við höfum heyrt í gert betur en það. Mest er að veiðast á flugu og það er eins og venjulega þessar litlu þyngdu púpur sem eiga helst að vera grænar eða grænleitar sem eru að gefa best en aðrar eins og Langskeggur, Héraeyra, Peter Ross, Bleik og Blá, Teal and Black og Black Zulu eru líka nefndar á nafn. Vatnið er hluti af Veiðikortinu og ef veðurspá næstu daga stenst með sól og hlýindum er þetta klárlega vatnið til að kíkja í.
