Engin vanda­­mál eða vond lykt eftir tunnu­­skiptin

Í Reykjavík er nú unnið að tunnuskiptum í Vesturbæ, svo verður farið í miðborg og Hlíðar, í Laugardal í ágúst og síðast í Háaleiti og Bústaði í september.

Lífrænum úrgangi hefur ekki verið safnað á höfuðborgarsvæðinu fyrr en nú, og samkvæmt upplýsingum frá Sorpu, hafa frá því í maí safnast alls 310 tonn af hreinum lífrænum úrgangi frá höfuðborgarsvæðinu. Í GAJU, gas og jarðgerðarstöð, verður unnið úr þeim bæði metangas og molta, sem síðar verður seld.

Settu saman síðustu hundrað tunnurnar

Í Hafnarfirði var í dag verið að setja saman síðustu tunnurnar og dreifa þeim. Verkefnisstjóri innleiðingar í bænum, Ragna Hlín Sævarsdóttir, segir innleiðingu hafa gengið vel. Fólk hringi dálítið til að óska eftir upplýsingum, en að flest mál sé hægt að leysa nokkuð skjótt.

„Það var verið að setja saman síðustu 100 tunnurnar í dag. Alls er búið að setja saman 4.700 tvískiptar tunnur, 1.800 brúnar tunnur fyrir blokkir á um 10.500 heimili. Við erum búin að endurmerkja 15.800 tunnur,“ segir Ragna og að þau séu á áætlun.

Hún segir að nokkuð sé hringt til að spyrja um flokkun og hvort það megi fækka tunnum en að fjöldi tunna verði endurskoðaður í haust þegar á að innleiða nýja gjaldskrá frá Húsnæðis- og mannvirkjastofnun.

Ragna segir að innleiðingin gangi aðeins betur í sérbýlum en það sé því hún geti verði flóknari í fjölbýlum, sem eru til dæmis með rennu. Hún segir að ýmist sé fólk að loka fyrir rennurnar eða noti þær aðeins fyrir almennt rusl. Annað þurfi fólk að ganga með niður í ruslageymsluna.

„Það gengur betur í sérbýlunum en húsfélög eru almennt að reyna að ýta undir íbúa að flokka betur. Það er alltaf hætta á því að tunnur verði innsiglaðar ef ekki er flokkað rétt. Þá lendir það á húsfélaginu að endurflokka.“

En hvernig taka íbúar í breytinguna? 

Þorsteinn Kristjánsson fékk sínar tunnur fyrir um tveimur vikur og segir vel hafa gengið að flokka. Á heimilinu voru áður þrjár tunnur en nú eru fimm, tvær auka tvískiptar. Hann gerir ráð fyrir að fækka þeim því þau nái ekki að fylla tunnurnar.

„Í mínu tilfelli hefur gengið mjög vel. Við vorum nýbúin að fá nýtt eldhús og það hafa ekki verið nein vandamál,“ segir Þorsteinn en í skúffu í innréttingunni er nú tunna fyrir hvern flokk. Hann segir að pokarnir sem hann hafi fengið fyrir matarleifarnar nýtist vel og að hann fari með pokann út um annan hvern dag, þau hafi hingað til ekki fundið neina slæma lykt.

„Engin lykt og þetta gengur mjög vel,“ segir Þorsteinn og að hann hafi þó tekið eftir því að fólk taki misvel í breytinguna.

„Það er upp og ofan. Sumir taka þessu ekki með opnum hug og ég veit að hefði ég ekki verið með nýja innréttingu þá hefði þetta verið meira vesen. Þetta eru fjórir flokkar og maður þarf að koma þessu fyrir einhver staðar,“ segir hann.