Fyrrum heims­meistari í hnefa­leikum stökk á Haaland úr stúkunni

Erling Braut Haaland skoraði annað af tveimur mörkum Manchester City í 2-1 sigri liðsins á Sheffield United í dag. Haaland misnotaði vítaspyrnu fyrr í leiknum og var því væntanlega sérstaklega ánægður að hafa náð að bæta fyrir þau mistök síðar í leiknum.

Þegar Haaland fagnaði marki sínu ákvað einn stuðningsmaður City að stökkva úr stúkunni og fagna með Norðmanninum. Öryggisverðir náðu síðan að fjarlægja manninn en Haaland virtist hafa nokkuð gaman af.

Í frétt The Sun er greint frá því að stuðningsmaðurinn hafi ekki verið hver sem er. Þetta var Terry Flanagan, fyrrum heimsmeistari í hnefaleikum en hann er mikill stuðningsmaður City.

Flanagan var heimsmeistari í léttivigt á árunum 2015-2017 og tapaði aðeins tveimur af þrjátíu og átta bardögum sínum á ferlinum.