„Í dag vil ég helst vera í minni eigin tísku­búbblu“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Vá, svo margt! Ég elska hvað tískan er breytileg og hvað hún hefur mikil áhrif á líðan fólks. Um leið og ég er komin í föt sem láta mér líða vel, þurfa ekki endilega að vera partýföt, þá kemst ég strax í gott skap.

Hver er uppáhalds flíkin þín og af hverju?

Úff, erfitt að velja. Mér finnst samt alltaf skemmtilegt að vera í flottum jakka! Maður getur nánast poppað upp hvaða flíkur sem er með einhverjum sturluðum jakka. 

Svo ef ég þyrfti að velja eina uppáhalds, ætli ég myndi ekki segja pels sem ég keypti á fatamarkaði á Íslandi. Risastór, svartur og hvítur Magnolion pels, einstakur! Svo get ég eiginlega ekki sleppt því að minnast á gömlu skíðaúlpuna hennar mömmu.

Eyðiru miklum tíma í að velja föt hverju sinni?

Oftast ekki. Flesta daga hoppa ég bara í þau föt sem eiga við skapið mitt þann dag – oftar en ekki vel ég frekar kósí föt, en þau verða líka að vera smá svöl. 

Svo þegar að eitthvað sérstakt tilefni er framundan þá finnst mér mjög gaman að skipuleggja í hverju ég ætla að vera og eyði þar af leiðandi meiri tíma í það. 

Ég fer alveg í klessu ef að ég er ekki búin að skipuleggja í hverju ég ætla að vera fyrir ákveðin tilefni. Það er nauðsynlegt að skreyta sig líka með flottu skarti þegar tilefni gefst.

Hvernig myndirðu lýsa stílnum þínum?

Ég er ekki með neinn ákveðinn stíl, mér finnst gaman að blanda saman ólíkum flíkum frá ólíkum tímabilum.

Hefur stíllinn þinn breyst mikið í gegnum tíðina?

JÁ, mjög mikið! Sem betur fer. 

Áður var ég mikið að eltast við trendið og hverju allir aðrir voru að klæðast þegar ég var yngri. Í dag vil ég helst vera í minni eigin tískubúbblu.

Hvaðan sækirðu innblástur í tískunni?

Ég sæki aðallega innblástur hjá fatahönnuðum, tónlistarfólki og fólki sem mér finnst svalt um allan heim. 

Mamma má nú eiga það að hún er alltaf frekar svöl á því og ætli það hafi ekki einhver áhrif á mig líka.

Ertu með einhver boð og bönn þegar það kemur að klæðaburði?

Ég pæli lítið í því, svo lengi sem að viðkomandi líður vel í fötunum sínum finnst mér það virka. En ég klæðist nánast aldrei high waisted buxum eða stuttum buxum, mér finnst það ekki fara mér þar sem ég er frekar lappalöng.

Hver er eftirminnilegasta flík sem þú hefur klæðst og af hverju?

Ætli ég verði ekki að minnast á nýjustu flíkina mína! 

Ég fékk vinkonu mína Sögu til þess að sauma á mig kjól fyrir afmælisveislu sem ég fór í nýlega. Ég fékk innblástur á netinu og bað hana um að reyna að endurhanna flíkina, sem tókst ekkert smá vel.

Býrðu yfir einhverju góðu ráði þegar það kemur að tísku?

Mitt besta ráð er að kaupa vandaðar flíkur. Síðan auðvitað að velja föt sem láta manni líða vel í stað þess að fylgja stöðugt tískustraumum sem eru í gangi hverju sinni.

Hér má fylgjast með Helgu Þóru á samfélagsmiðlinum Instagram.