„Gott að ná að spila svona mikið“

„Það var mjög gott að ná að spila rúmar 30 mínútur í þessum leik og tilfinningin var mjög góð. Ég var mjög spenntur í gærkvöldi og í allan dag að komast inn á völlinn. Mér líður afar vel í þessu Valsliði og þetta var mjög skemmtilegt,“ sagði Alexander Petersson sem spilaði sinn fyrsta leik í efstu deild hérlendis í 20 ár þegar Valur lagði Víking að velli í fyrstu umferð Olísdeildarinnar í kvöld.

„Við gerðum nóg í þessum leik en mér fannst að sigurinn hefði getað orðið stærri. Við þurfum að spila mun betur ef við ætlum að ná í sigur á móti FH í næstu umferð. Þetta var hins vegar fín upphitun fyrir þann leik. Við náðum í sigur og það er það sem skiptir máli,“ sagði þessi 43 ára gamli leikmaður. 

„Það verður gaman að mæta FH. Þeir eru með sterkt lið, lítið breytt lið frá því í fyrra og búnir að bæta við Aroni Pálmarssyni sem bætir liðið augljóslega mjög mikið. Við erum mjög spenntir fyrir því að taka á móti þeim hérna í Origo-höllina,“ sagði hann um næsta verkefni Valsliðsins.