Dæmd í fjögurra ára bann fyrir að falla á lyfjaprófi

Sjálfstæð rannsóknarnefnd komst að þeirri niðurstöðu að þessi 31 árs gamla tenniskona hafi viljandi brotið af sér og því væri ákvörðunin um fjögurra ára bann tekin. Hún gekkst undir lyfjapróf á meðan hún tók þátt á Opna bandaríska meistaramótinu í ágúst á síðasta ári og greindist með lyfið roxadustat í blóðinu.

Lyfið vinnur gegn blóðleysi og örvar framleiðslu rauðra blóðkorna, sem hjálpar til við upptöku súrefnis og hraðar endurheimt.

Halep var úrskurðuð í bráðabirgðabann í kjölfarið og hefur því tekið út rúmlega eitt ár af fjögurra ára banni. Hún má ekki taka þátt í eða mæta á neina tennisviðburði á vegum alþjóðlegra tennissambanda á meðan bannið er í gildi. Þá er nafn hennar ekki lengur að finna á heimslista kvenna í tennis, en hún sat um tíma í efsta sæti listans.