Samstarfinu lýkur eftir blautbolamálið

Leikmenn Villa hafa kvartað yfir nýjum búningum liðsins frá Castore. Þeir draga í sig svita og leggjast þétt upp að líkamanum. Kvennalið Villa hefur leik í ensku úrvalsdeildinni um helgina og leikmenn þess ku kvíða fyrir að spila í blautbolunum.

The Telegraph greinir frá því að viðræður hafa átt sér stað milli Villa og Castore og búist er við því að samstarfi þeirra ljúki eftir tímabilið.

Castore rauf þögnina í gær og sagðist ætla að taka á umkvörtunum Villa-manna vegna búninganna umdeildu.

Karlalið Villa mætir Brighton í hádeginu á morgun en kvennalið Villa fær Manchester United í heimsókn á sunnudaginn.