Októberspá Siggu Kling: Þú hefur lukkuna með þér

Sigga Kling skrifar 6. október 2023 06:00

Elsku Vatnsberinn minn, þú skalt skoða þessa Chi orku sem er að safnast í kringum þig og til þín. Í henni er falið svo mikið. Að hlusta á sjóinn, jörðina því hún andar og er að sjálfsögðu hin mesta orka, himininn og hamingjuna sem er svo sannarlega hjá þér, þú ert búin að velta mikið fyrir þér hvað er hamingjan og hvernig næ ég henni.

Vatnsberinn er frá 20. janúar til 18. febrúar.

Þú ert með hamingjuna, láttu þér verða það að blessun. Ekki fara illa með neinn þó að þú getir það og hreinsaðu samviskuna, þú getur það.

Þú þarft ekki að leita lengra heldur en að skoða þína nánustu og sjálfan þig, þar býr hún. Það er mikilvægt að vinna einhversskonar sjálfboða starf á þessum tíma hvort sem það er að taka til hjá ömmu þinni eða fara í Fjölskylduhjálpina og gefa bakstur eða mat.

Þú þarf að virkja í þér pollýönuna eins og ég segi stundum við sjálfa mig, „Sigga þú býrð ekki í Úkraínu er það“. Með þeim orðum verður það léttvægt allt sem ég er að ganga í gegnum. Þú ert bara að læra, þú baðst um það, í skóla jafnvel finnst manni asnalegt að læra stærðfræði eða dönsku, en þú hefur það afl að sjá alla litina í réttu ljósi og vera þakklátur þó að þú hafir synt á móti straumnum oftar en einu sinni og oftar en tvisvar.

Klippa: Októberspá Siggu Kling - Vatnsberinn

Ef þú ert ekki sannur sjálfum þér og liggur á leyndarmáli sem gæti farið illa með þig skaltu vita að það borgar sig ekki að hafa nein lík grafin í bakgarðinum, því orkan er þannig að ólíklegustu hlutir koma í ljós.

Það eru svo margir í þessu merki sem storma í átt að friðinum og núna er allt að snúast á þessari vatnsberaöld sem er þín. Þá gerist það að allt rusl fer á yfirborðið og þú veist að þú ert jarðengill og orðið engill þýðir sendiboði svo þessi tími þýðir að þú ert sendur til að hjálpa mannkyninu.

Gerðu þig sterkari og sterkari þá verður þér send vitneskja um allt sem þig langar að vita. Þú getur byrjað á einföldum hlut eins og að sjá fyrir þér eitthvað, hvort sem það er jakki sem þig langar í eða bara eitthvað stærra, þá birtist það eða möguleikinn til að afla þess.

Að vera sjálfselskur er fallegt orð því það þýðir að elska sjálfan sig, með því byggir þú upp þennan sterka engil sem býr í þér. Það er búið að vera mjög mikið að gerast á þessu ári 2023 og hafðu það sterkt í minni að þegar nýtt tungl myndast þá hefur þú lukkuna með þér, en ef þú tekur of sterkar ákvarðanir núna þá gætu þær orðið þér flóknar.

28. október er fullt tungl í nautsmerkinu það er tungl tilfinninga, friðar og jafnvægis, eftir því sem þú tengist betur öllu því jafnvægi sem heimurinn er að gefa þér, þá skilur þú að þú ert staddur í matrixi og þá sérðu að þú hefur mikil völd.

Beittu því sem þú hefur vel, þá verður þú óstöðvandi. Í ástinni mun allt ganga eins og best verður á kosið svo vertu ekki í neinum fíflagangi þar.

Knús og kossar,

Sigga Kling