Snorri hafði sigur í TikTok-málinu

„Já, innslagi var eytt á þeim forsendum að um væri að ræða hatursorðræðu. Þvílík verðbólga hlaupin í þetta orð sem er „hatur“,“ segir Snorri í samtali við Vísi.

Snorri segir að sama hversu mjög hann hafi leitað þá sé ekki að finna svo mikið sem örðu af hatri í máli sínu. Enda þætti honum það einkennilegt. „Síðan er ég að fara inn á TikTok núna, en ég kærði þetta, og ég sé að þetta er komið aftur. Nú er ég í fögnuði yfir að þeir hafi tekið kæruna til athugunar,“ segir Snorri. Sem veit ekki alveg hvort hann eigi að hlæja eða gráta því um leið og þetta er spaugilegt, þá varðar málið prinsipp og sé að því leytinu til grafalvarlegt.

Snorri Másson ritstjóri er skráður hjá Fjölmiðlanefnd sem fjölmiðill en um er að ræða vídeóblogg, skrif og hlaðvarp sem Snorri síðan deilir út á samfélagsmiðla. Hann segir ritskoðunarvald þeirra samfélagsmiðla verulega uggvænlegt. 

Klagaðu þann sem að þér þykir bestur

Og þá er ekki síður ámælisvert hvernig það virkar, hversu auðvelt það virðist að klína hatri upp á mann og annan..

„Þetta er gert sísvona án þess að manni sé veitt tækifæri til andmæla. Fyrst er ráðist í þetta og svo getur maður kært. Það bar árangur núna, en það var allt eins líklegt að þetta hefði verið strokað út. Hvað er um hefði verið að ræða áríðandi fréttir?“

Klippan var úti í þrjá daga og Snorri hefur ekki hugmynd um hvað varð til þess að hún var fjarlægð. En svo virðist sem eitthvað sé þar sagt sem kostaði að einhver fjöldi „tilkynnti“ klippuna og þá þannig að um væri að ræða hatursorðræðu.

„Ég var að tala um Skrekk og hversu grunsamleg tilviljun það væri að börn virðast oft tjá sig í takti við ráðandi hugmyndafræði. Fólk hefur auðvitað fullan rétt á að vera mér ósammála en ef leikreglurnar eru þannig að ef menn eru mér ósammála þá sé það tilkynnt sem hatursorðræða er hlaupin mikil verðbólga í þetta orð,“ segir Snorri.

Þetta er ekki aðferðin

Snorri segir völd samfélagsmiðla ærin en á sama tíma huggar hann sig við að ef markaðsaðstæður eru að einhverju leyti heilbrigðar getum við stólað á að ef sá miðill sem tekur augljósan og aktívan þátt í skoðanakúgun notenda sinna, að þá muni samkeppni birtast við þann miðil. En málið er flóknara en svo. Og þó sigur hafi hafst að þessu sinni sé skelfilegt að búa við þetta. Kælingaráhrifin séu mikil:

„Hegðaðu þér eða þér verður refsað. Það er þessi mekkanismi, mér hrís hugur við þessu. Og að auki, þá vona ég og ég geri ráð fyrir því, hvet til þess í þessu innslagi að sama á hvaða máli þeir eru, þeir eiga aldrei að kvitta undir svona aðferðir.“

Snorri er þarna að tala um hversu varasamt það geti verið að klaga alla þá sem eru þér ósammála fyrir hatur. Það lýsi mikilli firringu að ráðast með þeim hætti gegn tjáningarfrelsinu, fólk virðist ekki alveg vita um hvað það er að biðja.

Snorri sjálfur fer ítarlega yfir málið í nýjustu útgáfu af „Fréttum vikunnar“: