Týndi GPS-mæli þegar hann kastaði treyjunni sinni upp í stúku

Brighton vann leikinn, 2-3, og Mávarnir fögnuðu stigunum þremur vel og innilega með stuðningsmönnum sínum enda fyrsti sigur þeirra í sjö leikjum í ensku úrvalsdeildinni.

Veltman kastaði meðal annars treyju sinni til heppins stuðningsmanns upp í stúku. Hann áttaði sig skömmu síðar á því að GPS-mælirinn sem allir leikmenn í ensku úrvalsdeildinni og víðar spila með hafði fylgt með treyjunni.

Veltman þurfti því að snúa aftur út á völl og gera dauðaleit að treyjunni til að endurheimta GPS-mælinn. Stuðningsmaðurinn var farinn af vellinum en mælirinn skilaði sér til Veltmans á endanum.

Brighton er í 8. sæti ensku úrvalsdeildarinnar með 22 stig eftir þrettán leiki. Næsti leikur liðsins er gegn AEK Aþenu í Evrópudeildinni á fimmtudaginn. Á sunnudaginn sækir Brighton svo Chelsea heim í ensku úrvalsdeildinni.

Veltman, sem er 31 árs varnarmaður, kom til Brighton frá Ajax fyrir þremur árum. Hann hefur leikið 28 landsleiki fyrir Holland og skorað tvö mörk.