Hannes Hólm­steinn ber saman Klaustur­málið og „Kiki­málið“

Eins og ítrekað hefur komið fram hefur Arndís Anna beðist velvirðingar á atvikinu sem varð aðfararnótt laugardags þegar hún var handtekin eftir að hafa lent í útistöðum við dyraverði. En þeir brutust inn á salerni þar sem hún hafði dvalist um drykklanga stund.

Klausturmálið ölvunartal sem ekki var hægt að taka alvarlega

Sjálfstæðismenn hafa viljað velta fyrir sér öllum vinklum á málinu og nú hefur Hannes Hólmsteinn Gissurarson fyrrverandi stjórnmálafræðiprófessor bæst í hópinn. Hann vill bera saman Klausturmálið og það sem hann kýs að kalla „Kikimálið“. Það telur hann verðugt verkefni fyrir þá í hagnýtri siðfræði að rannsaka.

„Bæði málin snúast um þingmenn, sem missa stjórn á sér sakir ölvunar. Í Klausturmálinu var þó í rauninni ruðst inn á þingmennina, ölvunartal þeirra tekið upp og birt án leyfis (sem er skýrt brot á reglum um friðhelgi einkalífs). Það var miklu alvarlegra brot, myndu margir segja, en sjálft ölvunartalið, sem varla var hægt að taka alvarlega, það var eins og hvert annað raus og aldrei öðrum ætlað,“ segir Hannes Hólmsteinn.

Segir Arndísi Önnu hafa ráðist í ölæði á dyraverði og lögregluþjóna

Hann snýr sér þá að „Kikimálinu“ þar sem hann segist Arndís Önnu hafa ráðist í ölæði á bæði dyraverði og lögregluþjóna:

„Í Kikimálinu var hins vegar um að ræða þingmann, sem réðst í ölæði á dyraverði og lögregluþjóna, ef marka má fréttir. Einn augljós munur er, að ofbeldi var beinlínis beitt í Kikimálinu. Ungir píratar ályktuðu í Klausturmálinu, að þingmennirnir, sem við það voru riðnir, yrðu allir að segja af sér (líka þeir, sem ekkert sögðu gróft samkvæmt hinum ólöglegu upptökum). Hvað skyldu ungir píratar álykta í Kikimálinu?“

Ljóst er að Sjálfstæðismenn telja málinu engan veginn lokið. Brynjar Níelsson, sem nú vinnur að sérverkefnum í fjármálaráðuneytinu, hefur þegar stokkið til og skrifað í athugasemd: „Hefur engum blaðamanni dottið í hug að tala við Henry Alexander? Hann hefur alltaf verið vinsæll á RÚV.“

Ratar málið í Kastljósið?

Brynjar tjáði sig sjálfur um málið í gær á sinni eigin Facebook-síðu:

„Droll á salernum er þekkt vandamál á mörgum heimilum. Synir mínir áttu það til að dvelja þar langtímum saman sem varð til þess að ég varð að smíða kamar í garðinum sem neyðarúrræði því þeir gátu stundum teppt bæði salernin. Þótt þessi slímuseta á salernum tæki á leiddi það ekki til þess að við Soffía brytum upp hurðina til þess að fjarlægja þá með valdi hvað þá að óska þyrfti eftir aðstoð lögreglu. Svo gáfu þeir skýringar á þessu drolli sem var oftast að þeir hafi þurft að ljúka lestri á Andrésar Andar blaðinu, enda þekktar spennusögur þar að finna,“ sagði Brynjar.

„Nú gerðust þau nýmæli að þingmaður stundaði svona slímusetu á salerni á skemmtistað sem sóttur er af fólki í viðkvæmri stöðu. Þykir það sérstaklega óheppilegt því ætla má að fólk í viðkvæmri stöðu þurfi tíðari klósettferðir en aðrir. Varð það til þess að dyraverðir brutust inn á salernið og fjarlægðu þingmanninn, sem samkvæmt heimildum brást hinn versti við, eðlilega. Á endanum var beitt lögregluvaldi til að koma þingmanninum út og heim til sín. Andrésar Andar blaðið mun hafa tapast í þessum átökum.“

Brynjar vill meina að atburðurinn hafi þótt fréttnæmur á öllum miðlum nema Ríkisútvarpinu. Brynjar skrifaði pistil sinn í gær en blaðamanni telst þó til að fjórar fréttir hið minnsta hafi verið skrifaðar á vef RÚV.

„Kemur það nokkuð á óvart því að á Ríkisútvarpinu var það fyrsta frétt dögum saman á sínum tíma að nokkrir þingmenn í öli töluðu illa um pólitíska andstæðinga sína, sem þó er alþekkt en sjaldan til á upptöku. Var því fylgt eftir með nokkrum Kastljóssþáttum þar sem fórnarlömbin og aðrir gátu fengið nauðsynlega útrás fyrir hneykslun sína enda varla hægt að hugsa sér verri hegðun þingmanna.“

Brynjar slær á létta strengi eins og hann gerir gjarnan.

„En ég treysti því að Ríkisútvarpið sjái að lokum fréttina í þessu máli. Hún er auðvitað um ofbeldi öryggisvarða og lögreglu gagnvart fólki í viðkvæmri stöðu. Nú þarf að taka á teppið lögreglustjórana og þeir þurfa að svara fyrir þetta ofbeldi gagnvart fólki í viðkvæmri stöðu. Næstu Kastljóssþættir hljóta að fjalla um þetta með viðtölum við forsvarsmenn hinsegin samfélagsins og sérfræðinga í þeim fræðum. Annað væri hneyksli af hálfu fjölmiðils í almannaeigu og í almannaþágu.“

Uppfært 11:48

Samkvæmt Hjalta Birni Hrafnkelssyni samskiptastjóra þingflokks Pírata hélt Nútíminn því fyrst fram að dagbókarfærsla þar sem að lögregla hafði verið kölluð til til þess að fjarlægja ofurölvaðan einstakling eftir lokun á skemmtistað hafi átt við um Arndísi. „Þetta er hins vegar ekki rétt, atvikið átti sér stað fyrir lokun, enda var fólk á staðnum sem sá hvað gerðist, og að ég best veit er engin færsla um málið í dagbók lögreglu.“ Fréttin hefur verið lagfærð að teknu tilliti til þessarar ábendingar.