Grafni laxinn inn á 30.000 heimili hver jól

„Það fara yfir átta tonn af gröfnum laxi frá okkur í desember og það á einungis við um hálf flök. Eitthvað fer líka í bitum og svo fara heil flök í heildsölurnar. Við erum nánast söluhæst í gröfnum laxi á landinu en í heildina eru þetta fimmtán tonn af gröfnum laxi í desember mánuði,“ segir Hugrún Sigurðardóttir, framleiðslustjóri Norðanfisks en fyrirtækið hefur í tuttugu ár framleitt reyktan, grafinn og heitreyktan lax fyrir innanlandsmarkað auk ljúffengu jólasíldarinnar.

Óhætt er því að segja að talsverðar líkur séu á að gestum verði boðið upp á grafinn lax frá Norðanfiski í matarboðum kringum jólin, og það ekki að ástæðulausu. Galdurinn á bak við vinsældirnar segir Hugrún liggja í uppskriftinni og þar beitir hún ákveðnu leynivopni.

Hið fullkomna hlutfall

„Ég nota brúnan sykur meðan flestir nota hvítan, þá nota ég bæði grænt dill og brúnt  þurrkað dill, meðal annars. Uppskriftin er hátt í 40 ára gömul og má rekja til þeirra Eric Calmon og Gunnlaugs Guðmundssonar matreiðslumeistara sem stofnuðu Íslenskt franskt eldhús á sínum tíma. Ég stýrði framleiðslunni fyrir þá og hef ekki breytt einu grammi í uppskriftinni í öll þessi ár,“ segir Hugrún. „Við erum búin að finna okkar blöndu og í hvernig hlutföllum hún reynist best. Fólk getur gengið út frá því vísu að fá alltaf sama bragðið þegar það kaupir vörurnar okkar.“

Heitreyktur lúxus

Heitreykti laxinn frá Norðanfiski nýtur einnig mikilla vinsælda en styttra er síðan íslenskir neytendur fengu að kynnast honum. Hugrún segir vandasamt ferli á bak við framleiðsluna og til að byrja með var hann einungis framleiddur til útflutnings.

Þá hefur jólasíldin frá Norðanfiski slegið í gegn.

„Uppskriftin á bak við jólasíldina er rótgróin og mikið leyndarmál. Við notum ávallt nýja síld en ekki frosna og hún hefur algjörlega slegið í gegn. Grafni laxinn er alltaf bestur á snittubrauði með graflaxsósu og heitreykta laxinn er gaman að bera fram á salatbeði.“