Rúnar Alex aftur í Arsenal

Mike McGrath, blaðamaður Telegraph, segir á Twitter að framtíð Rúnars Alex sé í óvissu en hann víki frá Cardiff vegna komu hins 28 ára gamla Ethan Horvath frá Nottingham Forest.

Rúnar Alex, sem einnig er 28 ára, hefur verið samningsbundinn Arsenal frá því að enska stórveldið keypti hann frá Dijon í Frakklandi sumarið 2020. Hann skrifaði þá undir samning til fjögurra ára, sem rennur því út í sumar.

Frá Arsenal hefur Rúnar Alex farið að láni til OH Leuven í Belgíu, Alanyaspor í Tyrklandi og nú síðast Cardiff en hann lék aðeins sex leiki í ensku B-deildinni fyrir liðið og var 18 sinnum á bekknum. Til stóð að hann yrði að láni hjá Cardiff út tímabilið.

Í dag er lokadagur félagaskiptagluggans í helstu deildum Evrópu og mögulegt að Rúnar Alex verði orðinn leikmaður nýs félags í lok dags.