Þolin­mæði Netflix sögð við það að þrjóta

Þetta er fullyrt af breska götublaðinu The Sun. Hjónin gerðu risasamning árið 2020 við Netflix og Spotify.

Á síðasta ári rifti Spotify hlaðvarpsveitan samningum við hjónin. Báru forsvarsmenn hennar fyrir sig að þau hefðu einfaldlega ekki framleitt nægilega mikið efni.

Síðan samningar tókust við Netflix árið 2020 hafa hjónin framleitt þrjár sjónvarpsþáttaseríur fyrir streymisveituna. Ein var heimildarþáttarröð um vegferð hjónanna eftir að þau slitu tengsl sín við bresku konungsfjölskylduna og naut hún mikilla vinsælda.

Hinar tvær vöktu ekki eins mikla athygli en um var að ræða heimildarþætti um Invictus leikana sem Harry skipuleggur og svo viðtalsþætti við ungmenni sem tekið hafa þátt í starfsemi Archewell sjóðs þeirra hjóna.

Fram kemur í frétt breska miðilsins að hjónin vilji nú framleiða kvikmynd og sjónvarpsþáttaröð fyrir Netflix. Bæði verkefnin séu þó skammt á veg komin.

Samningur hjónanna við Netflix nær til 2025. Hann hljóðar upp á áttatíu milljónir punda, eða rúma 14 milljarða íslenska króna. Er fullyrt í frétt breska miðilsins að hjónin eigi í hættu á því að missa samninga sína við Netflix ef ekki styttist í efni.