Höjlund sló met sem Ronaldo átti

Höjlund lagði upp fyrsta mark United í 4-3 sigrinum gegn Wolves, í ensku úrvalsdeildinni í fótbolta í gær, og skoraði svo sjálfur skömmu síðar.

Þar með hefur Höjlund bæði skorað og lagt upp mark í tveimur deildarleikjum í röð fyrir United, og Daninn ungi virðist orðinn heitur eftir að hafa beðið lengi eftir fyrsta deildarmarki sínu fyrir félagið.

Höjlund fagnar 21 árs afmæli á sunnudaginn, þegar United tekur á móti West Ham. Það gerir hann að yngsta leikmanninum í sögu United til að skora og leggja upp mark í tveimur leikjum í röð, en metið var áður í eigu Ronaldo.

Höjlund er annar af aðeins tveimur leikmönnum í ensku úrvalsdeildinni sem hafa skorað og lagt upp mark í tveimur leikjum í röð, samkvæmt Squawka. Hinn er Bryan Mbeumo hjá Brentford.

Höjlund hefur nú skorað þrjú deildarmörk á leiktíðinni en það fyrsta kom á öðrum degi jóla, í 3-2 sigri gegn Aston Villa. Hann skoraði svo og lagði upp mark í 2-2 jafntefli við Tottenham í síðasta mánuði áður en hann endurtók leikinn í gærkvöld.