KSÍ og ÍTF ætla að efla sam­skiptin: „Knatt­spyrnunni á Ís­landi til heilla“

Nokkrar deilur hafa verið á milli KSÍ og ÍTF undanfarnar vikur og segir í yfirlýsingunni að umræðan varðandi samskipti KSÍ og ÍTF sé kveikjan að viljayfirlýsingunni.

„Í kjölfar nýafstaðins ársþings KSÍ og þeirrar umræðu sem uppi hefur verið varðandi samskipti KSÍ og ÍTF lýsa stjórnir beggja samtaka yfir vilja til aukins samstarfs knattspyrnunni á Íslandi til heilla,“ segir í yfirlýsingunni sem birtist á vef KSÍ. 

„ÍTF eru samtök félaga sem eiga lið í tveimur efstu deildum karla og kvenna. Öll félög innan ÍTF eru aðildarfélög KSÍ.“

Þá segir einnig að vilji sé af hálfu beggja aðila og að yfirlýsingin marki nýtt upphaf ap auknu og bættu samstarfi KSÍ og ÍTF.

„Af beggja hálfu er vilji til þess að leggja sérstaka áherslu á samstarf um móta- og dómaramál, markaðs- og kynningarmál, fræðslumál, og þróun ungra leikmanna. Með virku og opnu samtali og samstarfi næst mestur árangur.

Með viljayfirlýsingu þessari er markað nýtt upphaf að auknu og bættu samstarfi ÍTF og KSÍ sem báðir aðilar leggja áherslu á til lengri tíma og er í samræmi við stefnumótun beggja aðila.“