Adam Sandler sá Chelsea vinna Newcastle

Chelsea sigraði Newcastle, 3-2, á Stamford Bridge í gærkvöldi. Chelsea er í 11. sæti ensku úrvalsdeildarinnar með 39 stig.

Launahæsti leikari í heimi Adam Sandler mætti á Stamford Bridge í gær til að sjá sína menn í Chelsea.

Þetta er ekki í fyrsta sinn sem Sandler mætir á Stamford Bridge en hann mætti einnig á leik Chelsea og Fulham fyrir fimmtán árum eða svo. Það var fyrsti fótboltaleikurinn sem Sandler fór á.

Sandler mætti ekki á Óskarsverðlaunahátíðina á sunnudaginn og virðist hafa verið í London um helgina. Hann spilaði meðal annars körfubolta í Havaí-skyrtu og joggingbuxum.

Næsti leikur Chelsea er gegn Manchester City í ensku bikarkeppninni á laugardaginn.