Morgunrútína Söru Snæ­dísar sem eykur af­kasta­getu og orku

„Það getur verið mjög gagnlegt að vera með einhverjar fastar rútínur yfir daginn, eitthvað sem við gerum daglega sem skiptir okkur máli, eykur vellíðan og nærir okkur,“ segir Sara Snædís sem leggur áherslu á færri en fleiri atriði:

„Það skiptir mig máli að að hreyfa mig, huga vel að húðinni, næra mig vel og stunda núvitund og því reyni ég að koma þessu á morgnana og oftast á kvöldin líka. Ég er samt sveigjanleg og finnst skipta máli að taka tillit til aðstæðna og vera ekki með of heilagar rútínur þannig ef ekki gefst tími í þær eða eitthvað kemur upp á þá er allt í lagi að sleppa þeim, gera þær seinna eða breyta aðeins út af vananum.“

Fjarvinna og rútína í sólinni

Sara Snædís og unnusti hennar, Stefán Jökull Stefánsson, hafa búið í Stokkhólmi í Svíþjóð síðastliðin sex ár ásamt dætrum þeirra. Síðastliðið haust ákváðu þau að breyta um umhverfi í eitt ár og fluttu til Marbella á Spáni þar sem allir sinna skóla og starfi í fjarvinnu. 

„Það er mikilvægt að viðhalda rútínu á heimilinu og vöknum við alla morgna kl 7:30,“ segir Sara Snædís:

„Ég mæli eindregið með því að setja sér einhverja fasta liði sem alltaf eru gerðir á morgnana til þess að koma sér af stað og líka svo að þú gerir alltaf eitthvað á hverjum degi sem er tileinkað þér, fyrir þig.“

Morgunrútína Söru Snædísar

Stórt volgt vatnsglas. „Gott að kreista sítrónu út í.“

Hugleiðsla og 4-7-8 öndunaræfing í nokkrar mínútur. 

Húðumhirða: „Ég þvæ mér í framan með ísköldu vatni og ber á mig serum, augnkrem, rakakrem og sólarvörn. Ef ég hef tíma nota ég gua sha og nudda andlitið til þess að örva blóðflæðið og draga úr bólgum.“

Morgunmatur, kaffi og vítamín: „Ég borða alltaf morgunmat innan við klukkustund eftir að ég vakna og verður grísk jógúrt með appelsínu, lífrænu múslí og hnetusmjöri fyrir valinu eða eggjahræra með avókadó og súrdeigsbrauði. Stundum tek ég góðgerla fyrir morgunmat en passa að drekka kaffið eftir morgunmatinn, allavegana ekki á fastandi maga. Ég tek B-12 vítamín, fólat, D-vítamín, Omega-3, ashwagandha og magnesíum.“ 

Hreyfing: „Mér finnst æðislegt að ná æfingu á morgnana, þó svo að það náist ekki alltaf en einhver hreyfing er nauðsynleg til að liðka líkamann, koma blóðrásinni í gott stand og skerpa á heilanum áður en sest er niður í vinnutörn.“

Skipuleggðu daginn:  „Að þessu loknu sest ég niður og punkta hjá mér það sem mig langar að afreka yfir daginn. Fyrir mér er nauðsynlegt að skrifa það niður hjá mér áður en ég byrja að vinna svo ég helli mér ekki í of marga hluti á sama tíma heldur er með skýra stefnu fyrir daginn og get gert „check“ þegar hverju verkefni er lokið.“

Fyrir áhugasama er að hægt fylgjast með Söru Snædísi á samfélagsmiðlum og vefsíðunni Withsara.co