Steinunn Kristín ný í stjórn Varðar

Í fréttatilkynningu þess efnis segir að Steinunn Kristín sé stofnandi og stjórnarformaður Acton Capital AS og stjórnarformaður Norsk-íslenska viðskiptaráðsins. 

Hún hafi setið í stjórn Arion banka frá árinu 2017, og nýverið tekið sæti í stjórn hugbúnaðarfyrirtækisins Öldu. Steinunn búi í Ósló og sitji í stjórn YES-EU AS í Noregi, sem sé leiðandi á markaði í rafvæddum farartækjum fyrir almenningssamgöngur. Hún sé einnig fjárfestir í ýmsum fyrirtækjum í Noregi, meðal annars í hugbúnaðarfyrirtækjum. Hún hafi áður starfað sem framkvæmdastjóri hjá Beringer Finance og hjá Íslandsbanka, síðar Glitni.

Steinunn sé með meistaragráðu (MiM) í alþjóðlegri stjórnun og fjármálum frá Thunderbird í Bandaríkjunum og BA-gráðu í alþjóðaviðskiptum og stjórnmálafræði frá University of South Carolina í Bandaríkjunum.