Á sér engar máls­bætur vegna hrottafenginna brota gegn eigin­konu

Ákæran á hendur honum var í þrettán liðum en í héraði var hann sakfelldur í þeim öllum. Landsréttur sakfelldi hann í sex þeirra.

Það var hins vegar niðurstaða Landsréttar að refsingin skildi haldast óbreytt þar sem Heiðar væri sakfelldur fyrir alvarlegustu brotin sem málið varðar.

Heiðari er gert að greiða konunni sex milljónir króna, en í héraði var niðurstaðan sjö milljónir króna.

Heiðar var sakfelldur fyrir nauðgun, stórfellda líkamsárás, stórfellt brot í nánu sambandi, en Landsréttur segir að hann hafi endurtekið og á sérstaklega sársaukafullan hátt ógnað lífi og heilsu konunnar.

Brotin sem Heiðar var ákærður fyrir áttu sér stað á fjögurra ára tímabili. Honum var gefið að sök að brjóta á konunni á brúðkaupsnótt þeirra, og einu sinni yfir landsleik í handbolta.

Á sér engar málsbætur

Karlmaðurinn var handtekinn þann 25. febrúar þegar tilkynnt var um heimilisofbeldi á sameiginlegu heimili hans og konunnar. Um var að ræða atvikið þar sem konan hlaut lífshættulega áverka.

Í dómi Landsréttar segir að brotin sem Heiðar er sakfelldur fyrir séu mörg og gróf.

„Ekki fer á milli mála að brotaþoli bjó á sambúðartímanum við alvarlegt ógnar- og óttaástand, þjáningu og kúgun, þar sem ákærði misnotaði freklega yfirburðastöðu sína gagnvart henni og beitti hana ítrekað ofbeldi með tilheyrandi neikvæðum áhrifum á heilsu, líðan og velferð hennar,“ segir í dómi Landsréttar.

Þá er fullyrt að Heiðar eigi sér engar málsbætur.