Maðurinn sem greindi frá and­láti Elísa­betar II játar barna­níð

Edwards játaði á sig þrjú brot sem áttu sér stað á árunum 2020 til 2021 en málið tengist spjalli sem sjónvarpsmaðurinn átti við annan mann á WhatsApp frá 2020 til 2022.

Maðurinn sendi Edwards 377 kynferðislegar myndir og myndskeið, þar af 41 af börnum. Af myndunum og myndskeiðunum af börnunum voru sjö flokkaðar sem A, alvarlegasta tegund af barnaníð, tólf sem B og 22 sem C.

Flest börnin á alvarlegustu myndunum og myndskeiðunum voru ætluð á aldrinum 13 til 15 ára en síðasta myndskeiðið sem maðurinn sendi Edwards virðist sýna dreng á aldrinum 7 til 9 ára.

Maðurinn sagði í spjallinu að drengurinn virtist ungur og að hann ætti fleiri „ólöglegar“ myndir. Edwards bað hann um að senda sér ekki neitt ólöglegt. Hann hélt engu að síður áfram að eiga í samskiptum við manninn.

Lögmaður Edwards hefur sagt að það sé engar vísbendingar um að hann hafi sjálfur búið til, geymt eða sent kynferðislegar myndir af börnum. Öll tæki hans hafi verið skoðuð og ekkert fundist nema á WhatsApp.

Eins og fyrr segir játaði Edwards að hafa „búið til“ kynferðislegar myndir af börnum en samkvæmt Sky News getur það þýtt „að opna, ná í, geyma eða taka á móti“ myndefni.

Þá útskýrir miðillinn enn fremur að myndir eða myndskeið flokkuð A sýni alvarlegustu brot, til að mynda nauðgun, myndir og myndskeið flokkuð B önnur kynferðisbrot og C myndir og myndskeið sem sýna ekki kynlífsathafnir. Þar getur til að mynda verið um að ræða nektarmyndir.

Edwards hefur verið fastur liður á skjám Breta í áratugi og var meðal annars sá sem greindi frá því að Elísabet II Bretadrottning hefði fallið frá. Þá fór hann fyrir umfjöllun BBC um krýningu Karls III.

Edwards var sendur í leyfi frá störfum í júlí í fyrra eftir að hann var meðal annars sakaður um að hafa greitt 17 ára einstaklingi fyrir kynferðislegar myndir frá 2020. Hann sagði upp í apríl síðastliðnum.