„Maður er bara stoltur af liðinu“

„Þetta var hrikalega góður og sterkur sigur,“ sagði Höskuldur í leikslok. „Maður er bara stoltur af liðinu að vera bæði grjótharðir og fastir fyrir varnarlega, en á sama tíma hugrakkir. Við vorum að pressa þá varnarlega allan tímann og héldum vel í boltann.“

„Við vorum með ágæta stjórn á leiknum og svo var Anton [Ari Einarsson] bara í heimsklassa. Hann heldur okkur á floti í byrjun þegar hann á nokkrar vörslur í röð. Svo komum við okkur betur inn í leikinn og menn vou að kasta sér fyrir í lokin og þetta var bara geggjað.“

Blikar voru þó ekki með fullkomna stjórn á leiknum frá upphafi, því Valsmenn voru mun hættulegri fyrri hluta fyrri hálfleiks.

„Þeir voru það og eru með mjög mikil einstaklingsgæði. Þeir náðu að búa til dauðafæri, en Anton var bara með ótrúlegar vörslur.“

Þá segir Höskuldur það hafa verið verðugt verkefni að eiga við Gylfa Þór Sigurðsson inni á miðsvæðinu.

„Það var auðvitað bara mjög gaman og verðugt verkefni. Og drulluerfitt líka. Hann er aðeins sneggri að fara í lykilsendingar en maður er vanur og maður fékk stundum að finna fyrir því. En heilt yfir bara ótrúlega gaman.“

Hann segir þó að Blikarnir ætli ekki að horfa of mikið í þennan sigur.

„Við ætlum ekkert að mikla þetta of mikið fyrir okkur. Við vorum bara staðráðnir í að mæta hugrakkir og mér fannst við ná því eftir svona 15 mínútur í kvöld, bæði með bolta og án. Auðvitað var þetta mjög þýðingarmikill leikur þannig það var risastórt að vinna hann.“