Lítil hamingja á heima­velli hamingjunnar

Víkingar halda toppsætinu á markatölu og þeir eru einnig komnir í bikarúrslitaleiknum og eru tveimur leikjum frá sæti í riðlakeppni Sambandsdeildarinnar. Þessu hafa þeir náð þrátt fyrir dapurt gengi á heimavelli sínum.

Víkingur tapaði 2-1 á heimavelli á móti Skagamönnum í gær og í deildarleiknum á undan náði liðið aðeins jafntefli við Vestra. Báðir nýliðarnir hafa því tekið stig úr Víkinni í síðustu leikjum.

Víkingsliðið hefur aðeins unnið einn af síðustu sex heimaleikjum sínum í öllum keppnum og sá sigur kom á móti botnliði HK. Í sjöunda leiknum þurfti Víkingsliðið vítakeppni til að slá Stjörnuna út úr undanúrslitum bikarsins.

Þrátt fyrir að hafa komist svona langt í Evrópu þá hefur það verið gott gengi á útivelli sem er að koma Víkingum áfram. Liðið á nefnilega enn eftir að vinna Evrópuleik í Víkinni í sumar. Tap á móti Egnatia og jafntefli á móti bæði Shamrock Rovers og Flora Tallinn.

Næsti leikur Víkings er fyrri leikur liðsins á móti Santa Coloma frá Andorra í Sambandsdeild UEFA. Hvort fyrsti Evrópusigurinn líti dagsins ljós á fimmtudagskvöldið verður að koma í ljós.