Um­deilt upp­á­hald arki­tekts við Austur­völl

Téður doktor, Páll Jakob Líndal, er þeirrar skoðunar að sagnfræðin og sálfræðin hafi orðið útundan við hönnun á nýbyggingum, einkum í miðbænum. Páll lýsti meðal annars Smiðu, nýju skrifstofuhúsnæði Alþingis sem „árás inn í umhverfið“ en var afar ánægður með nýbyggingar í Hafnarstræti, sem reistar eru í gamaldags stíl í anda þess sem gjarnan var byggt á fyrri hluta síðustu aldar.

Arkítektar risu víða upp á afturlappirnar við þennan málflutning Páls. Á meðal þeirra sem eru honum um margt ósammála er Birkir Ingibjartsson, arkitekt og varaborgarfulltrúi Samfylkingarinnar. „Arkitektúr er mjög margslungið fag og að búa til borg hefur margar víddir. Mér fannst Páll taka heldur einfaldan póll í hæðina á köflum,“ segir Birkir. 

„Ég er sammála því að ég held það sé mikilvægt að við vinnum með söguna í borginni. Það er sterkur hluti af öllum lifandi borgum að sagan sé sýnileg og að hvert tímabil í sögu borgarinnar fái að njóta sín. Og það er eitthvað sem ég myndi segja að sé nokkuð ríkt í Reykjavík. Við erum með mörg hús sem byggð eru á ólíkum tíma. Þótt að Ráðhúsið virki nútímalegt þá er það þrjátíu ára gamalt eða svo, Oddfellowhúsið er áttatíu, níutíu ára og svo erum við með eitt nýfætt,“ segir Birkir og bendir á Smiðju. Sjálfur lýsir hann sig mikinn aðdáanda byggingarinnar.

Máli sínu til stuðnings bendir Birkir á hús Almennra trygginga sem tekið var í notkun árið 1960. Húsið stendur mitt í Guðjóns Samúelssonar-samloku, ef svo má að orði komast, og Birkir segir hana gott dæmi um hvernig byggingarstílar mismunandi tímabila í sögunni kallist á - og njóti sín saman. Húsið var raunar umdeilt á sínum tíma, þar sem mörgum þótti það einmitt passa illa við sköpunarverk Guðjóns.

„Hér kemur þessi ótrúlega einfalda, græna bygging á milli Hótel Borgar og Apóteksins, sem maður þekkir vel. Þetta hús er eitt af mínum uppáhalds við Austurvöll. Það að þetta hús komi hér á milli, að það sé ekki enn ein bygging í sama stíl og Hótel Borg eða Apótekið, það gefur þessum tveimur síðarnefndu meira vægi að fá yngri „aðila“ með sér. Kontrastinn á móti gefur þeim aukna vigt.“

Göngutúr með Birki um Kvosina má horfa á í heild sinni hér fyrir ofan. Við stöldrum við fjölda mannvirkja - og Birkir segir okkur auk þess frá því sem honum þykir afleitt við nútímabyggingarlist.