Þrota­bú Wok on vill tug­milljóna endur­greiðslu frá Kristjáni

Ein­ar Hugi Bjarnason, skiptastjóri þrotabús Wok on, segir í samtali við fréttastofu að við yfirferð á bókhaldi félagsins hafi komið í ljós óútskýrðar færslur, bæði í bókhaldi sem og millifærslur á bankareikningum, sem ekki hafi fengist fullnægjandi skýringar á.

Mbl.is greindi fyrst frá þessu, en í frétt miðilsins kemur fram að félag Kristjáns, Darko ehf. hafi um tíma verið í eigu fjölskyldumeðlims hans áður en hann var aftur skráður eigandi þess.

Greint var frá því í febrúar á þessu ári að Davíð Viðarsson, eða Quang Le, væri orðinn eini eigandi Wok on.

Einar segir að um sé að ræða ótal færslur frá Wok in til Darko, sem eins og áður segir eru á fjórða tug milljóna. Eitthvað sé um færslur í öfuga átt, frá Wok on til Darko, en þær séu mjög litlar í samanburði.

Darko var hluthafi í Wok on, en Einar útskýrir að það sé óheimilt fyrir einkahlutafélög að veita hluthöfum lán. Litið sé svo á að um ólögmæta lánveitingu hafi verið að ræða.

Einar segir að eignir á vegum Darko hafi veirð kyrrsettar til tryggingar á skuldinni. „Þannig það er búið að gera ráðstafanir til að reyna að tryggja það að krafan fáist greidd fari málið eins og lagt er upp með.“

Mbl.is greindi einnig frá því á dögunum að launakröfum í þrotabúið hefði verið hafnað að hluta vegna þess að skiptastjórar teldu sig ekki hafa nægar upplýsingar um hversu margar vinnustundir starfsfólk hefði unnið.

Einar segir að allar kröfur hafi verið samþykktar upp að vissu marki.

„Það eru samþykkt laun í uppsagnarfresti og ef um ógreidd laun er að ræða, og orlofsgreiðslur og annað þvíumlíkt. En síðan voru ekki lögð fram fullnægjandi gögn um annað tjón en þetta, eins og til dæmis að einhver hafi unnið fleiri vinnustundir heldur en tímaskýrslur og launaseðlar gefa til kynna.“

Að mati Einars hefur yfirstandandi sakamálarannsókn ekki beina tengingu við kröfurnar, en vissulega geti eitthvað komið upp við slíka rannsókn sem hafi áhrif á málið.