Sem auðvitað á líka við og getur stundum verið nokkuð flókið mál. Enda uppsagnir ekki á allra færi. Á sumum vinnustöðum jafnvel ekki mögulegur valkostur nema að afloknu löngu og flóknu ferli.
Á dögunum fjallaði FastCompany stuttlega um þetta, með því að gefa stjórnendum tvö ráð, sem hljóma í megindráttum svona:
1. Rétt skal vera rétt
Það fyrsta sem hver og einn þarf að gera er að líta í eigin barm: Er þetta viðhorf þitt alls kostar rétt? Eða er eitthvað að hafa áhrif á það hvernig þér finnst viðkomandi?
Er viðkomandi starfsmaður kannski einstaklingur sem ögrar þér sem stjórnandi? Véfengir stundum eða gagnrýnir? Starfsmaður sem þú leggur þig ekki fram um að styðja?
Eða er þetta fyrir alvöru starfsmaður sem þú telur eitraðan fyrir vinnustaðinn? Og ef já, hvað er það sem rökstyður þessa niðurstöðu þína?
2. Að hlusta sérstaklega vel
Næst er að kryfja málin svolítið og kortleggja hvenær þér finnst einhver hegðun koma þannig fram að við henni þarf að bregðast. Til þess að koma í veg fyrir að neikvæðnin smiti út frá sér.
Ein góð leið er að leggja sig sérstaklega fram við að hlusta alltaf á viðkomandi, áður en þú svarar en sýna þó frumkvæði í að kalla fram álit viðkomandi. Hvernig?
Jú, tökum dæmi:
Segjum sem svo að þú sért í samtali við viðkomandi eða að leiðbeina um eitthvað en heyrir, sérð og upplifir á svöruninni sem þú færð, að viðkomandi er ekki sammála eða sátt/ur. Þá er upplagt að spyrja: Ég sé að þú ert ekki alveg sammála. Hvernig fyndist þér að þetta ætti að vera? Eða: Ég veit að þetta er að fara í taugarnar á þér, en við þurfum samt að geta rætt þetta.
Mundu samt alltaf að markmiðið þitt er fyrst og fremst að hlusta mjög vel á viðkomandi og vanda þig í tali þannig að þú sért að vinna að uppbyggilegum og jákvæðum samskiptum. Óháð því hvernig viðkomandi hegðar sér.
Að leita til fagaðila
Oft lagast hlutirnir á ótrúlega jákvæðan máta, þegar að við sjálf leggjum okkur betur fram í hreinskiptum og góðum samskiptum. Stjórnendur ættu þó ekki að hika við að leita til fagaðila eða mannauðssviðs til stuðnings. Í dag er orðið mun algengara að stjórnendur njóti stuðnings í starfsmannamálum. Hvort sem sá stuðningur kemur innan frá eða utan frá.
Þá er gott að hafa í huga að neikvæð hegðun eða viðhorf starfsmanns til stjórnanda eða vinnustaðar, hefur oftast erfið og neikvæð áhrif á samstarfsfólk. Erfiðleikarnir geta því undið upp á sig ef ekkert er að gert.
