Bann Arnars stað­fest og Jón Þór byrjar næsta ár í banni

Enginn leikmanna Víkings og Breiðabliks verður í banni þegar liðin mætast í úrslitaleiknum um Íslandsmeistaratitilinn á sunnudagskvöld.

Hins vegar, eins og fram hefur komið, verður Arnar Gunnlaugsson þjálfari Víkinga í banni vegna uppsafnaðra gulra spjalda. Arnar fékk sitt þriðja gula spjald í sumar fyrir að hlaupa inn á völlinn í fögnuðinum við hádramatískt sigurmark gegn ÍA á laugardaginn, og hafði einnig fengið gult spjald í Meistarakeppninni 1. apríl. Fjögur gul spjöld þýða eins leiks bann.

Arnar hefur einnig fengið tvö rauð spjöld í sumar og missir samtals af fimm leikjum í Bestu deildinni vegna leikbanna í sumar.

Jón Þór Hauksson, þjálfari ÍA, verður einnig í banni um helgina en hann fékk rautt spjald vegna hegðunar sinnar í garð dómara eftir tapið gegn Víkingum, þar sem mistök dómarans kostuðu Víkinga sigurmark.

Jón Þór fékk tveggja leikja bann og verður því einnig í banni þegar ný leiktíð hefst í Bestu deildinni á næsta ári.

Jón Þór missir af leiknum við Val á laugardag og Valsmenn verða án Bjarna Mark Antonssonar og Kristins Freys Sigurðssonar, vegna uppsafnaðra spjalda. Kristinn er kominn með tíu áminningar á leiktíðinni og Bjarni fjórar.

Leikurinn er afar mikilvægur fyrir Val en sigur tryggir liðinu 3. sæti deildarinnar, Evrópusæti. Tapi Valur gæti Stjarnan náð 3. sætinu með sigri gegn FH. Þar verða FH-ingar án Böðvars Böðvarssonar sem kominn er með sjö áminningar.

Fjórir í banni frá leiknum á Ísafirði

Í neðri hlutanum verða fjórir leikmenn í banni þegar Vestri tekur á móti Fylki á laugardaginn. Gunnar Jónas Hauksson verður ekki með heimamönnum vegna rauða spjaldsins sem hann fékk gegn KA í síðustu umferð, og hið sama má segja um Nikulás Val Gunnarsson úr Fylki sem fékk rautt gegn KR. Tveir Fylkismenn til viðbótar, þeir Arnór Breki Ásþórsson og Birkir Eyþórsson, missa af leiknum við Vestra vegna uppsafnaðra áminninga.

Vestri þarf sigur til að tryggja sér áframhaldandi veru í Bestu deildinni. Liðið er jafnt HK að stigum en með mun betri markatölu. Annað þessara liða mun fylgja Fylki niður í Lengjudeildina. HK-ingar mæta KR í leik sem fram fer á heimavelli Þróttar í Laugardal.